तनहुँ। सुन्दा पत्यार नलाग्न सक्ला तर एक रुपैयाँ बचतले ८ करोड रुपैयाँ बराबरको पुँजी संकलन भएको छ। तनहुँको बन्दीपुर गाउँपालिका–४ स्थित बिमलनगर आमा समूहले एक रुपैयाँबाट बचत सुरु गरेको कोषमा हाल ८ करोड रुपैयाँ जम्मा भएको छ।
समूहले १, २, १०, २०, ५० र १ सय रुपैयाँका दरले क्रमिक रुपमा बचत गर्दै आएको थियो। विस २०५४ सालमा समूहले सहकारी सञ्चालन गर्ने निर्णय अनुरुप मर्स्यांदी आमा बचत तथा ऋण सहकारी संस्था स्थापना गरेका थिए। आमा समूहले बचत गर्दै आएको पैसाले सहकारी सञ्चालन गरेपछि अहिले संस्थाको पुँजी ८ करोड रुपैयाँभन्दा बढी पुगेको हो।
महिलाले सञ्चालनमा ल्याएको उक्त सहकारी गाउँपालिकामै नमूना र अनुकरणीय रहेको संस्थाकी लेखा संयोजक बबिता थापाले बताइन्। अहिले सहकारी संस्थामा ८ सयभन्दा बढी सेयर सदस्य छन्। 'सुरुमा एक रुपैयाँ बचत गर्ने महिलाले अहिले मासिक १ हजार ५ सय रुपैयाँसम्म जम्मा गर्न थालेका छन्,' उनले भनिन्।
सहकारी संस्थामा कार्यरत सबै कर्मचारी महिला छन् भने लेखा समिति, शिक्षा उपसमिति, ऋण उपसमिति, धितो मूल्याङकन समिति लगायतमा महिलाले नै नेतृत्व गर्दै आएका छन्। धितो राखेर १५ लाख रुपैयाँसम्म ऋण दिन सक्ने अवस्थामा सहकारी पुगेको संस्थाकी अध्यक्ष बास्ना कुमारी मगरले बताइन्।
सहकारीले कृषि र उच्च शिक्षा पढ्नका लागि शिक्षा धितोमा १२ प्रतिशत र अन्य शीर्षकका कर्जामा १४ प्रतिशत ब्याजमा ऋण दिँदै आएको छ। गाईपालन, तरकारी, धूप तालिम र घरबास सञ्चालन लगायतमा लगानी गर्ने गरिएको सो संस्थाले जनाएको छ। संस्थाको आफ्नै भवन छ।
तत्कालीन समयमा १ लाख ४६ हजार रुपैयाँमा जग्गा खरिद गरी केही नगद खर्च र श्रमदानबाट भवन निर्माण गरिएको लेखा संयोजक थापाले बताइन्। वडामा रहेका आमा समूहले सामाजिक क्रियाकलाप विवाह, व्रतबन्धलगायत कार्यमा सक्रिय हुँदै आएको छ भने वडाभित्र सीमित रहेको सहकारी संस्थालाई पालिका तहसम्म क्षेत्र विस्तार गरिएको छ। आगामी दिनमा सहकारीलाई गण्डकी प्रदेशस्तरमा लैजानेलगायत योजना बनाइएको अध्यक्ष मगरले बताइन्। रासस
