तेह्रथुम। हिउँदमा बिक्री नभएका सुन्तला शीतभण्डारमा राखेपछि किसानले दुई महिनामै तीन गुणा बढी मूल्य पाएका छन्।म्याङलुङ–९ साब्लामा सञ्चालित मेयङलुङ शीतभण्डारमा हिउँदमा सुन्तला भण्डारण गर्दा प्रतिकिलो ६० थियो। अहिले प्रतिकिलो दुई सयले बिक्री भइरहेको छ।
कोसी प्रदेश सरकारको तीन करोड, म्याङलुङ नगरपालिका र कियाचु कृषि सहकारी संस्थाको एक करोड ३० लाख साझेदारीमा म्याङलुङ–९ साब्लामा १ हजार मेट्रिक टनको शीतभण्डार सञ्चालनमा छ।
प्रतिकेजी २ रुपैयाँ ५० पैसा प्रतिमहिना भाडा तिरेर माघ अन्त्यतिर शीतभण्डारमा राखेको दुई महिनामै स्थानीय बजारमा सुन्तलाले तीन गुणा बढी मूल्य पाउँदा किसानलाई फाइदा भएको म्याङलुङ–२ की मेनुकाकुमारी श्रेष्ठले बताइन्।
‘हिउँदमा सुन्तला बिक्री नभएर बगानमै कुहिने अवस्था थियो। बिक्री भइहाले पनि प्रतिकेजी ५० रुपैयाँमा व्यापारीले मागिरहेका थिए । अहिले तीन गुुणा बढी मूल्य पायो। हामी खुसी छौं’, श्रेष्ठले भनिन्।
यसअघि शीतभण्डारमा भण्डारण अनुभव नभएकाले बिग्रिने हो कि भनी डराइडराई सुन्तला भण्डारण गरेको म्याङलुङ–२ का मोतीराज तुम्बाहाङ्फे बताए। ‘साथीहरुले बिग्रिन्छ, नराख भन्दै थिए तर भण्डारणको समय कटिङ र लेबलिङमा ध्यान दिने हो भने नबिग्रिने रहेछ’, उनले भने।
२०७० मा दर्ता भएको कियाचु कृषि सहकारीमार्फत मेयङलुङ शीतभण्डार गत वर्षदेखि सञ्चालित छ। किसानमा शीतभण्डारको उपयोगिताबारे थाहा नभएकाले किसानसँग छलफलमा रहेको शीतभण्डारकी व्यवस्थापक कुमारी लिम्बूको भनाइ छ।
यस वर्ष शीतभण्डारमा किवि तीन हजार किलो, सुन्तला दुई हजार किलो भण्डारण गरिएको छ। अब आलु बिउ भण्डारण तयारी भइरहेको व्यवस्थापक लिम्बूले बताइन्। हिउँदमा खान पाइने सुन्तला चैत, वैशाखमा किनेर खान पाएकामा स्थानीय उपभोक्तासमेत खुसी छन्।–रासस
