काठमाडौं। अर्थमन्त्री वर्षमान पुनले सरकार निजी क्षेत्रसँग हातेमालो गरेर अघि बढ्ने बताएका छन्। अमेरिकी चेम्बर अफ कमर्सका प्रतिनिधिसँग सोमबार मन्त्रालयमा भएको भेटमा उनले निजी क्षेत्रको मनोबल बढाउने गरी सरकारले काम गरिरहेको जानकारी दिए।
लगानी सम्मेलनको वातावरण बनाउन लगानीसम्बन्धी ऐनका दर्जन प्रावधानमा संशोधन गर्न लागिएको र यसले वैदेशिक लगानी आकर्षित गर्न मात्र नभई आन्तरिक लगानी वातावरण निर्माणमा सहयोग पुग्ने मन्त्री पुनको भनाइ थियो।
मुलुकमा तीव्र आर्थिक विकासका लागि आन्तरिक स्रोत परिचालन मात्र पर्याप्त नहुने भएकाले बाह्य लगानी आकर्षित गर्नैपर्नेमा अर्थमन्त्रीले जोड दिए। नेपालमा लगानीको वातावरण बनाउनुपर्छ भन्नेमा राजनीतिक दलबीच मतैक्य रहेको पनि मन्त्री पुनले स्पष्ट गरे।
‘सरकारले निजी क्षेत्रलाई ‘ड्राइभिङ’ सिटमै राखेर काम गर्ने हो’, मन्त्री पुनले भने, ‘सरकार र निजी क्षेत्रबीच आपसी साझेदारी र विश्वासका साथ काम गरौं भन्नेमै प्रधानमन्त्री पुष्पकमल दाहाल र मेरो जोड छ।’
लगानी वातावरणका लागि नीतिगत निरन्तरता र स्थायित्व हुनुपर्नेमा सरकार स्पष्ट गरेको चर्चा गर्दै उनले पछिल्लो डेढ देशकमा जलविद्युत् र सिमेन्ट उद्योगको विकासमा भएको प्रगतिका कारण नीतिगत स्थायित्व भएको उल्लेख गरे।
‘गणतन्त्र नेपालको प्रथम प्रधानमन्त्री हुनुभएको समय प्रधानमन्त्री प्रचण्डले लिएको नीतिका कारण आज हाइड्रोपावरमा हामीले धेरै प्रगति गरेका छौं। १० हजार मेगावाट विद्युत् भारतमा निकासी वातावरण बनेको छ। सिमेन्ट उद्योगका लागि सडक र बिजुली व्यवस्था सरकारले गरिदिएका कारण सिमेन्ट निर्यात वातावरण बनेको छ । यो सबै नीतिगत निरन्तरताका कारण भएको हो,’ उनले दाबी गरे।
फरक प्रसंगमा उनले नेपालले आईटी क्षेत्रलाई प्राथमिकतामा राख्नुपर्ने समय आएको र सरकारले त्यसबारे सोचिरहेको बताए। ‘हाम्रोजस्तो भू–परिवेष्ठित मुलुकका लागि अन्य उत्पादनको बाह्य बजार खोज्नुभन्दा सजिलो आईटी प्रोडक्टको उत्पादन बजार खोज्न हुन्छ’, पुनले भने, ‘आईटी सेक्टरको प्रर्वद्धनका लागि नीतिगत निरन्तरता हुने गरी काम गर्छौं,’ मन्त्री पुनले भने।
उक्त अवसरमा अमेरिकी चेम्बर अध्यक्ष निर्मलकाजी श्रेष्ठ नेतृत्वको प्रतिनिधिमण्डलका सदस्यले अर्थतन्त्र सुधारका लागि अर्थमन्त्रीलाई विभिन्न सुझाव दिएका थिए।
