डोटी। डोटीमा प्याज खेतीप्रति किसानको आकर्षण बढ्न थालेको छ। जिल्लाका विभिन्न स्थानका किसानले प्याजखेती गरिरहेका छन्। शिखर नगरपालिका–३ सालाखर्कस्थित तुलसीगण्यानीमा सोही ठाउँका सकराम महराले २० रोपनी जमिनमा प्याज खेती गरेका छन्। २०६१ देखि कृषिकर्म गरिरहेका ६१ वर्षीय महराले गत वर्ष आठ रोपनीमा प्याज खेती गरेका थिए।
कृषि ज्ञान केन्द्र डोटीबाट सिँचाइका लागि पाइप र बीउ पाएपछि यो वर्ष प्याज खेती विस्तार गरेको उनले बताए। बीस रोपनी जमिनमा विभिन्न चरणमा चार किलो प्याजको बीउ रोपिएको महराले बताए। 'बीउ फरक–फरक समयमा राखेको थिएँ, त्यसरी नै फरक समयमा सबै जमिनमा प्याज रोपिएको हो। प्याज रोप्न ५५ दिन बराबर ज्यालामा स्थानीयलाई काम लगाएको छु,' महराले भने, 'एक दिन काम गरेबापत एक जनालाई आठ केजी प्याज दिने सहमति भएको छ।'
उनले सिजनमा २५ रुपैयाँदेखि ३५ रुपैयाँसम्म प्रतिकिलो र बेसिजनमा ४५ रुपैयाँदेखि ८० रुपैयाँसम्म प्रतिकिलोका दरले प्याज बिक्री गर्ने बताए। प्याज उत्पादन गर्नुभन्दा पनि बिक्री गर्न समस्या हुने गरेको महराको समस्या छ। 'सिजनमा भनेको मूल्य पाइँदैन, बेसिजनमा बेच्दा मूल्य पाइन्छ तर प्याज जोगाउन गाह्रो हुन्छ, प्याज भण्डारणका लागि कुनै व्यवस्था नहुँदा धेरैजसो प्याज बिग्रिएर जाने गरेको छ,' उनले भने।
महराले यस वर्षदेखि प्याजको बीउ पनि उत्पादन गर्न सुरु गरेका छन्। पहिलो पटक एक सय ५० गाना प्याज बीउँका लागि रोपिएका छन्। महराले गरेको प्याज खेती सुदूरपश्चिम प्रदेशका पहाडी जिल्लाकै नमूना रहेको कृषि ज्ञान केन्द्र डोटीका निमित्त कार्यालय प्रमुख गंगादत्त अवस्थीले बताए।
महराले गरेको प्याज खेतीबाट आफू प्रभावित भएपछि उनलाई प्रोत्साहनस्वरूप ज्ञान केन्द्रबाट बीउ र सात सय मिटर ३२ एमएमको सिँचाइ पाइप सहयोग गरिएको अवस्थीले बताए। महराले प्याज रोपेको जमिनबाट करिब २ क्विन्टल प्याज उत्पादन हुने अनुमान गरिएको उनले बताए। किसानले फलाएका प्याजको बजारीकरण गर्न व्यापारीसँग समन्वय गरिरहेको पनि अवस्थीले जानकारी दिए।
यसैगरी, बोगटान फुड्सिल गाउँपालिका–१ का यम बमले १० रोपनी जमिनमा प्याज खेती गरेका छन्। उनले काटैस्थित मौडामा प्याजखेती गरिरहेको बताए। उषा बहुउद्देश्यीय कृषि तथा पशुपक्षी फार्म खोलेर कृषि पेशा गरिरहेका बमले तीन वर्षदेखि प्याज खेती गर्दै आएका छन्। बमले थप ४० रोपनी जग्गामा प्याज खेती गर्ने योजन बनाएका छन्। दिपायल सिलगढी नगरपालिका–२ पन्तोलाका ध्रुव मलासीले पनि प्याज खेती गरेका छन्। उनले ६ रोपनी जमिनमा प्याज र दुई रोपनीमा लसुन लगाएको बताए। लसुन, प्याज बेचेर गर्जो टार्न सकिने भएकाले यसतर्फ आफू आकर्षित भएको उनको भनाइ छ।
