काठमाडौं। जापान र नेपालका व्यवसायीहरूले जापानको श्रम बजारमा बढ्दो नेपाली जनशक्ति माग र त्यसको आपूर्ति तथा जापान जाने नेपालीहरूलाई सीपमूलक तालिमका विषयमा छलफल गरेका छन्। एरु एकेडेमी ओसाका र क्योउदाइ रेमिट्यान्स तथा आइएमईको संयुक्त आयोजनामा भएको दोस्रो जापान-नेपाल शैक्षिक तथा औद्योगिक व्यापार अन्तरक्रियामा जापानमा उपलब्ध अवसरलाई उपयोग गर्ने विषयमा छलफल भएको हो।
कार्यक्रममा टोकियोस्थित नेपाली दूतावास, फुकुओका अवैतनिक वाणिज्य दूतावास, मोरिकोसान कम्पनी, ओसाका पर्यटन ब्युरो, मानव संसाधन विकास र एसिया औद्योगिक व्यापार निर्माण प्लेटफर्म, कान्साइ अर्थ, व्यापार तथा उद्योग ब्युरो, ओसाका चेम्बर अफ कमर्स एण्ड इन्डस्ट्री, ओसाका बिजनेस डेभलपमेन्ट एजेन्सी, स्टडी अब्रोड कन्सोर्टियम ओसाका, क्लब हाउस ग्लोबल रिपब्लिक, नान्काइ रेल्वे कम्पनी लगायतको सहभागिता थियो। अनलाइन र प्रत्यक्ष उपस्थितिमा भएको छलफल कार्यक्रममा जापानबाट ९५ र नेपालबाट ६० भन्दा बढी कम्पनी सहभागी थिए। कार्यक्रमलाई जापानको तर्फबाट एरु एकेडेमीका अध्यक्ष केईइची हासेगावा र माकोतो साकिमुरा, कान्साइ अर्थ, व्यापार तथा उद्योग ब्यूरोका प्रोजेक्ट म्यानेजर हागीहारा दाइसाकुले सम्बोधन गरेका थिए।
नेपालका तर्फबाट जापानका लागि नेपाली राजदूत डा. दुर्गाबहादुर सुवेदी र आईएमई ग्रुपका संस्थापक तथा प्रबन्ध निर्देशक हेमराज ढकालले सम्बोधन गरेका थिए। दुई चरणमा गरिएका कार्यक्रमको पहिलो चरणमा जापान-नेपाल सम्बन्ध, जापानको श्रम बजारमा बढ्दो नेपाली कामदारको माग र त्यसको आपूर्तिबारे छलफल भएको थियो। त्यसैगरी पछिल्लो समय आक्रामक रूपमा बढिरहेको नेपालीको जनसंख्यासँगै सम्भावित समस्या र त्यसको निराकरणक लागि चाल्नुपर्ने कदमलगायत विषयमा वक्ताहरूले आफ्नो विचार प्रस्तुत गरेका थिए। दोस्रो शत्रमा नेपालबाट अनलाइनमार्फत् सहभागी कम्पनीहरूलाई जापानमा विविध क्षेत्रमा नेपाली जनशक्ति भित्र्याउन चाहने कम्पनीहरूसँगै व्यवसायिक रूपमा जोड्न सहयोग गर्ने विषयमा केन्द्रित थियो।
पर्यटन, होटल, रेस्टुरेन्ट उद्योग, दक्ष जनशक्ति, सूचना प्रविधि, उत्पादन उद्योग, घरजग्गा व्यवसाय तथा मानव संसाधनलगायत विभिन्न ग्रूपमा वर्गीकरण गरी परिचयात्मक अन्तर्क्रिया कार्यक्रम गरिएको थियो। त्यस्तै नेपालबाट जापानमा विद्यार्थीलगायत विविध क्षेत्रका कामदारहरू पठाउन चाहने र नेपालको विभिन्न क्षेत्रमा व्यवसाय प्रवर्द्धन तथा अभिवृद्धि गर्न चाहने जापनिज कम्पनीहरूलाई व्यावसायिक छलफल र व्यापारिक साझेदारीको सम्भावनालगायत विषयमा अन्तर्क्रिया गराइएको थियो। कार्यक्रममा जापानका लागि नेपाली राजदूत डा. सुवेदीले जापान-नेपालको लामो दौत्य सम्बन्धको चर्चा गर्दै कार्यक्रममार्फत नेपाल र जापानको व्यापार व्यवसाय प्रवर्द्धन तथा जापानी लगानीकर्तालाई नेपालमा लगानीका लागि सक्दो सहयोग गर्न सधैं तयार रहेको बताए।
कार्यक्रममा आईएमई ग्रुपका संस्थापक तथा प्रबन्ध निर्देशक ढकालले जापानले नेपालबाट भाषा विद्यार्थी, सामान्य कामदार मात्रै नभएर सूचना प्रविधिलगायत क्षेत्रमा दक्ष जनशक्ति लिन सक्ने भएकाले त्यसतर्फ प्रयास गर्नुपर्ने बताए। यसैगरी नेपालमा ठूला परियोजनाहरूमा वैदेशिक लगानीको माग रहेकोले नेपालमा लगानी गर्न पनि प्रबन्ध निर्देशक ढकालले जापानी कम्पनीहरूलाई आग्रह गरे। यही अप्रिलमा आयोजना हुन गइरहेको नेपाल लगानी सम्मेलन २०२४ मा सहभागिताका लागि ढकालले जापानी लगानीकर्ताहरुलाइ आग्रह गर्नु गरे।
एरु एकेडेमीका अध्यक्ष केईइची हासेगावाले नेपाल र जापानको लगानी सम्बन्धलाई मजबुत बनाउन छलफल कार्यक्रम आयोजना गरिएको बताए। कार्यक्रमलाई सन्देश मार्फत क्योउदाइ रेमिट्यान्सका अध्यक्ष तथा नेपाली दूतावास जापान फुकुओकाका वाणिज्यदूत किमोतो युइचिरोले नेपालसँगको लामो व्यवसायिक सहकार्य बढाउन तत्पर रहेको बताए।
