काठमाडौं। उद्योग, वाणिज्य तथा आपूर्तिमन्त्री दामोदर भण्डारीले राज्यका सबै निकायमा सातामा दुई दिन स्वदेशमा उत्पादित पोसाक लगाउने व्यवस्था गर्ने सोच सरकारले बनाएको बताएका छन्।
नेपाल उद्योग तथा व्यवसायी महासंघद्वारा ललितपुरको महालक्ष्मी नगरपालिकामा आयोजित ‘विद्यमान व्यावसायिक समस्या तथा समाधान विषयक’ अन्तरक्रियामा उनले नेपाली पोसाक प्रयोग पहिलो चरणमा सबै मन्त्रीहरुले गर्ने जानकारी दिए।
वर्तमान सरकार स्वदेशी उत्पादन बढाउने ध्येयका साथ लागेको उल्लेख गर्दै मन्त्री भण्डारीले भने, ‘सातामा दुई दिन नेपाली कोट, पाइन्ट, जुत्ता, टोपी, शिरदेखि पाउसम्म राज्यका सबै निकायमा उपभोग गर्ने नीति हामी ल्याउँदै छौँ। पहिला सबै मन्त्री, त्यसपछि सांसद र स्थानीय तहका जनप्रतिनिधिले लगाउनेछन्।’
उनले नेपाली बजारमा स्वदेशी उत्पादनको क्षमता अध्ययन गरी सोहीअनुसार बजार वृद्धि गरेर राज्यका हरेक निकायमा सो पोशाक लगाउन अनिवार्य गरिने बताए। ‘नेपाली उद्योगले दिन सक्छन् कि सक्दैनन्, पहिला विस्तृत रुपमा उत्पादनको अवस्था अध्ययन गरेर त्यसपछि उत्पादनमा प्रोत्साहन गरिनेछ’, उनले भने।
नेपाली बजारमा निर्यातभन्दा आयात उच्च रहेको उल्लेख गर्दै मन्त्री भण्डारीले सरकार निर्यात प्रवर्द्धनमा केन्द्रित हुने बताए। सरकारको मुख्य अहिलेको उद्देश्य जनतामा उत्पन्न भएको निरासालाई आशामा बदल्ने रहेको उनको भनाइ थियो।
सरकारले अघि सारेको उत्पादन वृद्धिका लागि ‘स्टार्टअप’ नीति कार्यक्रमलाई केही दिनभित्र सञ्चालनमा ल्याउने तयारी भइरहेको उनले जानकारी गराए।
‘प्रधानमन्त्री नेपाली उत्पादन कार्यक्रम’ आगामी आर्थिक वर्षबाट प्रभावकारी बनाउने गरी अर्को मन्त्रिपरिषद् बैठकबाट कार्यविधि पारित गरेर नेपालका स्वदेशी वस्तु उत्पादनमा अभिप्ररित गर्ने अगाडि बढाइने उनले बताए।
नेपाली वस्तुले बजार नपाएको सन्दर्भ उल्लेख गर्दै उनले उद्योग मन्त्रालयबाट निर्यातमुखी व्यवसाय सञ्चालनका लागि आवश्यक तालिम तथा सीप व्यवस्था गरिने धारणा व्यक्त गरे।
