आर्थिक कार्यविधि तथा वित्तीय उत्तरदायित्व प्रतिस्थापन विधेयक पारितमा अन्योल

अर्थतन्त्र

गृहपृष्ठ
अर्थतन्त्र

आर्थिक कार्यविधि तथा वित्तीय उत्तरदायित्व प्रतिस्थापन विधेयक पारितमा अन्योल

क्यापिटल नेपालशनिबार, चैत १०, २०८०

फाइल तस्बिर

काठमाडौं। आर्थिक वर्षको बजेट ल्याउनु तीन महिनाअघि नै संसद्मा बजेटका प्राथमिकता र सिद्धान्तबारे छलफल गर्ने व्यवस्थासहितको ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८०’ चैत २१ भित्र पारित हुनैपर्ने बाध्यता छ।

तत्कालीन समय संसद् अधिवेशन सञ्चालन नभएकाले सरकारले गत माघ ४ मा ‘आर्थिक कार्यविधि तथा वित्तीय उत्तरदायित्व अध्यादेश’ ल्याएको थियो। नेपालको संविधानको धारा, ११४ को उपधारा (२) बमोजिम उक्त अध्यादेश ६० दिनभित्र संघीय संसद्को दुवै सदनबाट स्वीकृत भई पारित हुनुपर्नेछ।

दुवै सभाबाट फागुनको पहिलो साता उक्त अध्यादेश पारित भए पनि सरकारले चैत ९ मा मात्रै प्रतिनिधिसभामा प्रतिस्थापन विधेयक दर्ता गराएकाले उक्त अवधिभित्र पारित गर्न चुनौती देखिएको संसद् सचिवालयका सहायक प्रवक्ता दशरथ धमलाले बताए।

चालू आर्थिक वर्षको बजेटबारे छलफल चलाइँदा बजेट ल्याउनु तीन महिनाअघि नै परामर्श गर्नुपर्ने व्यवस्था बनाउन सरकार सहमत भएको थियो।अध्यादेशबाट तीन महिनापूर्व छलफल गर्नुपर्ने व्यवस्था कायम गरी सिद्धान्त र प्राथमिकताबारे छलफल गरिएको हो।

यसअघि आर्थिक वर्षको बजेट ल्याउनु १५ दिनअघि मात्रै संसद्मा बजेटका प्राथमिकता र सिद्धान्तबारे छलफल गर्ने व्यवस्था थियो।

प्रतिनिधिसभा बैठक चैत १८ यता बस्ने कार्यक्रम छैन। त्यसपछिका तीन दिनमा छलफल र संशोधनका प्रक्रियाबाट दुवै सदनबाट पारित हुन समयको चाप परेको धमलाको भनाइ छ।

प्रकाशित मिति: शनिबार, चैत १०, २०८० १५:१०

प्रतिक्रिया दिनुहोस्