लगानी सम्मेलन : आयोजनाको प्रस्तुति ३ चरणमा हुने (सूचीसहित)

पूर्वाधार

गृहपृष्ठ
पूर्वाधार

लगानी सम्मेलन : आयोजनाको प्रस्तुति ३ चरणमा हुने (सूचीसहित)

शर्मिला न्याैपानेबिहीबार, चैत ८, २०८०

काठमाडौं। लगानी सम्मेलनमा सोकेसका लागि ३ चरणमा आयोजना राखिने भएको छ। आयोजना छनोट गरी लगानी सम्झौतापछि सिधै काम अघि बढाउन सकिने, सम्झौतापछि विस्तृत अध्ययन गर्नुपर्ने र देखाउनकै लागि मात्र आयोजना समेटिने लगानी बोर्ड नेपालले जनाएको छ। बोर्डका प्रवक्ता प्रद्युम्नप्रसाद उपाध्यायका अनुसार पहिलो चरणमा प्राविधिक अध्ययन सकिएका आयोजनाहरु सिधै सम्झौताका लागि सोकेसमा राखिन्छ।

दोस्रो चरणमा नेपाल सरकार वा निजी क्षेत्रले केही अध्ययन गरिसकेका आयोजना समावेश हुने प्रवक्ता उपाध्यायले बताए। ‘आयोजनाहरुको पूर्ण अध्ययन भएको हुँदैन तर, निर्माण गर्न आवश्यक र सम्भावना देखिएका आयोजना समावेश गरिन्छ,’ उनले भने, ‘खरिद प्रक्रियाअनुसार त्यस्ता आयोजनाको ठेक्का आह्वान हुन्छ, जिम्मेवारी दिनेले थप अध्ययन गर्न पनि सक्छ।’ त्यस्तै तेस्रो चरणमा प्रदर्शनका लागि मात्रै आयोजना राखिनेछ। अर्थात् कुन ठाउँमा कस्ता आयोजना बनाउन सकिन्छ भन्ने विषयमा अडियो÷भिडियोमार्फत् जानकारी दिने तयारी छ। तेस्रो चरणका आयोजना तत्काल निर्माण हुन्छन् भन्ने निश्चित हुँदैन।
२०८१ वैशाख १६ र १७ गते तस्रो लगानी सम्मेलन हुँदैछ। जसका लागि संघीय सरकारका मन्त्रालय तथा मातहतका निकायहरु, स्थानीय तह, निजी क्षेत्रबाट आयोजना प्रस्ताव भएका छन्। कुल १३५ वटा आयोजनाको प्रस्ताव बोर्डमा पुगेको छ।

प्रस्तावित आयोजना छनोट गर्न बोर्डले प्राविधिक समिति गठन गरेर अध्ययन र छलफल गर्दैछ। चैत तेस्रो सातासम्म आयोजना सोकेसको काम सकिने बोर्डका सहप्रवक्ता रमेश अधिकारीले बताए। १३५ प्रस्तावित आयोजनामध्ये ७ वटा निजी क्षेत्र, ४ वटा स्थानीय तह र बाँकी १२४ वटा आयोजना संघीय सरकारले प्रस्ताव गरेका हुन्। बोर्डले १३५ प्रास्तावितमध्ये क्यापिटल नेपाललाई ११८ आयोजनाको नाम उपलब्ध गराएको छ। बाँकी १७ आयोजनाको विवरण भने खुलाएको छैन। ऊर्जा जलस्रोत तथा सिँचाइ मन्त्रालयबाट सबैभन्दा बढी आयोजना प्रस्ताव भएको देखिएको छ।