काठमाडौं। प्रतिनिधिसभाबाट विश्वासको मत लिँदै गरेका प्रधानमन्त्री पुष्पकमल दाहाल प्रचण्डले निरन्तरको प्रयासले देशको आर्थिक सूचकहरू सकारात्मक हुँदै गएको दाबी गरेका छन्।
प्रधानमन्त्रीले बुधबार विश्वासको मत लिनुअघि प्रतिनिधिसभालाई सम्बोधन गर्दै अर्थतन्त्र सुधारका लागि आफू सुरुदेखि नै अनवरत रूपमा लागेको र पछिल्लो अवस्थामा अर्थतन्त्रका अधिकांश सूचक राम्रा हुँदै गएको दाबी गरेका हुन्।
उनले भने, ‘चालू आर्थिक वर्षको सात महिनाको अवधिमा २ खर्ब ९७ अर्ब ७२ करोडले शोधनान्तर बचत छ। विदेशी विनिमय सञ्चिति १९ दशमलव ९ प्रतिशतले वृद्धि भई झन्डै १८ खर्ब ४५ अर्ब बराबर पुगेको छ।’
व्यापार घाटा एक दशमलव आठ प्रतिशतले घटेको उल्लेख गर्दै प्रधानमन्त्रीले आन्तरिक अर्थतन्त्रतर्फ सात महिनाको अवधिमा मुद्रास्फीति पाँच दशमलव एक प्रतिशतमा सीमित गरिएको बताए। उनले कर्जा प्रवाह चार दशमलव सात प्रतिशतले बढेको उल्लेख गरे।
‘विद्यमान आर्थिक अवस्थालाई सरकारको ठूलो उपलब्धिका रुपमा व्याख्या गर्न नसकिने होइन तर आन्तरिक उत्पादन र रोजगारी वृद्धिमा अपेक्षित प्रगति हुन सकेको छैन’, प्रधानमन्त्री दाहालले भने, ‘पुँजीगत खर्च पनि अपेक्षाअनुसार बढाउन सकिएको छैन। राष्ट्रिय गौरव र प्राथमिकता प्राप्त आयोजनालाई थप द्रुतता दिने, पुँजीगत खर्च बढाउने र सार्वजनिक सेवा प्रवाहमा थप सुधार गर्नुपर्नेछ।’
उनले प्रशासनयन्त्रलाई चुस्तदुरुस्त बनाउनु, प्रक्रियागत अवरोध हटाउनु र निजी क्षेत्रको क्षमताको पूर्ण उपयोग हुने वातावरण सृजना गर्नु आफ्नो पहिलो प्राथमिकता हुने स्पष्ट पारे।
बैंक तथा वित्तीय क्षेत्र र मौद्रिक नीतिमा गरिएका सुधारका कारण बैंकका आधार ब्याजदर एकल अंकमा पुगेको र ऋणको ब्याजदर पनि घटेको बताउँदै प्रधानमन्त्री दाहालले भने, ‘व्यापार घाटामा कमी आएको छ, तर निर्यात बढाउन सकिएको छैन। विप्रेषण त बढेको छ तर योसँगै भित्रिने सीप, अनुभव र दक्षताको उपयोग गरी देशभित्र उत्पादन र रोजगारी बढाउन सकिएको छैन।’
