बजेट अभावमा स्वास्थ्यकर्मीले पाएनन् ४ महिनादेखि तलब

अर्थतन्त्र

गृहपृष्ठ
अर्थतन्त्र

बजेट अभावमा स्वास्थ्यकर्मीले पाएनन् ४ महिनादेखि तलब

क्यापिटल नेपालमंगलबार, फागुन २२, २०८०

भजनी। कैलालीको जानकी गाउँपालिकामा कार्यरत स्वास्थ्यकर्मीले ४ महिनादेखि तलबभत्ता नपाएको गुनासो गरेका छन्। उनीहरुले चालु आर्थिक वर्षको असोजसम्मको मात्र तलबभत्ता पाएका छन्। तलबभत्ता रोकिएपछि दैनिक जनजीवन चलाउन मुस्किल हुन थालेको उनीहरूको भनाइ छ। 'आएको तलबभत्ताबाटै घर खर्चदेखि बालबालिकाको विद्यालयको शुल्कलगायत आधारभूत खर्चको जोहो गर्नुपर्ने बाध्यता छ। त्योभन्दा अरु आयस्रोत हामीसँग छैन,' गाउँपालिकामा कार्यरत स्वास्थ्यकर्मी प्रमोद कठरियाले भने, 'समयमा पैसा नआएपछि जनजीवन चलाउन समस्या हुन थालेको छ। घर–व्यवहार चलाउन मुस्किल हुँदै गएको छ भने बैंकको ब्याज तिर्न सकिएको छैन।'

संघीय तहबाट स्थानीय तहमा समायोजन भएर आएका स्वास्थ्यकर्मीले पाउँदै आएको तलबभत्ता गाउँपालिकाले बजेटको अभाव देखाउँदै रोकिदिएको छ। संघीय सरकारबाट आर्थिक वर्षको सुरुमै आउनुपर्ने पर्याप्त बजेट नआएपछि समस्या भएको गाउँपालिकाले जनाएको छ। संघीय तहबाट आउनुपर्ने बजेट समयमा आउन नसकेका कारण समस्या देखिएको गाउँपालिकाका लेखा अधिकृत दिनेश माझीले बताए। 'गाउँपालिकामा कार्यरत स्वास्थ्यकर्मीका लागि वार्षिक तीन करोड रुपैयाँभन्दा बढी बजेट चाहिन्छ। यस वर्ष एक करोड १४ लाख रुपैयाँमात्रै आएको हुँदा असोजसम्मलाई भयो,' उनले भने, 'अन्य शीर्षकबाट पनि खर्च गर्न नपाइने भएपछि कार्यरत स्वास्थ्यकर्मीको ४ महिनाको तलब रकम भुक्तानी गर्न सकिएको छैन।'

हाल गाउँपालिकामा संघीय तहबाट स्थानीय तहमा समायोजन भएर आएका ४९ स्वास्थ्यकर्मी कार्यरत छन्। स्थानीय तहले करार तथा ज्यालादारीमा व्यवस्थापन गरिएका अन्य कर्मचारीले भने नियमित तलबभत्ता पाइरहेका छन्। 'मन्त्रालयबाट तलबभत्ता शीर्षकमा आएको रकम तीन महिनामा सकिएपछि बाँकी आउने रकम समयमा नआउँदा समस्या आएको हो,' स्वास्थ्य शाखा प्रमुख जितबहादुर चौधरीले भने, 'हामीले गाउँपालिकाबाट मन्त्रालयलाई ताकेता गर्दै आएका छौँ। स्वास्थ्य मन्त्रालयले अर्थ मन्त्रालयलाई रकमका लागि आग्रह गरिसकेको भन्ने आएको छ, आशा गरौँ तलब आउँछ।'

गाउँपालिकाले पटक–पटक स्वास्थ्य तथा जनसङ्ख्या मन्त्रालयलाई स्वास्थ्यकर्मीको तलबभत्ताका लागि लिखित तथा मौखिक आग्रह गर्दै आएको गाउँपालिकाका अध्यक्ष गणेश चौधरी बताए। 'हामीले हाम्रो तर्फबाट गर्ने प्रयास गरिरहेका छौँ। मन्त्रालयले जतिसक्दो चाँडो कर्मचारीको तलबभत्ता व्यवस्थापन गरोस् भन्ने हो,' उनले भने। गत वर्ष यस्तै समस्या भजनी नगरपालिका र जोशीपुर गाउँपालिकामा पनि देखिएको थियो। रासस

प्रकाशित मिति: मंगलबार, फागुन २२, २०८० ०८:००

प्रतिक्रिया दिनुहोस्