प्रविधि

एनसेल सेयर खरिद‍-बिक्री अध्ययन प्रतिवेदन कार्यान्वयनका लागि सञ्चार मन्त्रीको टेबुलमा

काठमाडौं। एनसेल सेयर खरिद-बिक्री अध्ययन प्रतिवेदन कार्यान्वयनका लागि सञ्चार तथा सूचना प्रविधिमन्त्री रेखा शर्माको टेबुलमा पुगेको छ। फागुन ६ गतेको मन्त्रिपरिषद् बैठकले एनसेलको सेयर खरिद-बिक्री अध्ययन प्रतिवेदन कार्यान्वयनका लागि सम्बन्धित निकायमा पठाउने निर्णय गरेको थियो। सोही निर्णयअनुसार करिब २ साता ढिला गरेर प्रतिवेदन सञ्चार मन्त्रालयमा पुगेको हो।

मन्त्रालयका सहसचिव एवं प्रवक्ता नेत्रप्रसाद सुवेदीका अनुसार उक्त अध्ययन प्रतिवेदन बुधबार मन्त्रालयमा आइपुगेको हो। ‘एनसेल सेयर खरिद-बिक्री अध्ययन प्रतिवेदन कार्यान्वयनका लागि हिजो बुधबार सञ्चार मन्त्रालयमा आइपुगेको छ,’ प्रवक्ता सुवेदीले क्यापिटल नेपालसँग भने, ‘प्रतिवेदन मन्त्री शर्मासमक्ष पुगेकाले अब कार्यान्वयनमा जानेछ।’

आजियाटा स्वामित्वको एनसेलको ८० प्रतिशत सेयर सतिशलाल आचार्यको नाममा दर्ता भएको स्पेक्ट्रालाइट कम्पनीले खरिद गरेपछि यो विषय विवादित बनेको थियो। आजियाबाट सतिशलालको स्पेक्ट्रालाइटले ५ करोड अमेरिकी डलर (करिब ६ अर्ब ६५ करोड रुपैयाँ)मा एनसेलको ८० प्रतिशत सेयर खरिद गरेको भनिएको थियो।

निकै कम मूल्यमा खरिद-बिक्री भएको ‘देखाइएको’ भन्दै यस विषयमा प्रश्न उठेपछि सरकारले पूर्वमहालेखा परीक्षक टंकमणी शर्माको नेतृत्वमा ५ सदस्यीय छानबिन समिति गठन गरेको थियो। सो समितिले माघ १५ गते सरकारलाई प्रतिवेदन बुझाएको थियो। सरकारले औपचारिक रुपमा उक्त प्रतिवेदन हालसम्म सार्वजनिक गरेको छैन।