काठमाडौं। नेपाल क्रिकेट संघ (क्यान) ले ‘ए’ ग्रेडमा पर्ने पुरुष खेलाडीलाई मासिक तलब रु १ लाख दिने निर्णय गरेको छ। फागुन १२ र १४ मा बसेको क्यान केन्द्रीय कार्यसमिति बोर्ड बैठकले पुरुषतर्फ ‘ए’ ग्रेडमा पर्ने खेलाडीलाई मासिक १ लाख तलब दिने निर्णय गरेको हो। ‘ए’ ग्रेडमा ६ जना खेलाडी पर्न सफल भएका छन्।
बैठकले पुरुषतर्फ ‘बी’ ग्रेडमा पर्ने खेलाडीलाई ७० हजार, ‘सी’ ग्रेडलाई ५५ हजार, ‘डी’ ग्रेडलाई ३५ हजार तथा इमर्जिङ समूहमा पर्नेलाई २५ हजार प्रदान गर्ने निर्णय गरेको छ। ‘ए’ ग्रेडमा राष्ट्रिय क्रिकेट टोलीका कप्तान रोहितकुमार पौडेलसहित सोमपाल कामी, दीपेन्द्रसिंह ऐरी, आसिफ शेख र कुशल भुर्तेल छन्।
त्यसैगरी ग्रेड ‘बी’मा कुशल मल्ल, गुलशन झा, भीम सार्की, ललित नारायाण राजवंशी र अभिनाश बोहरा छन्। ग्रेड ‘सी’मा विनोद भण्डारी, अर्जुन साउद, सन्दीप जोरा र प्रतिश जिसी छन्।
ग्रेड ‘डी’मा पवन सर्राफ, सागर ढकाल, अनिल शाह, विवेककुमार यादव, आकाश चन्द, बसिर अहमद र सूर्य तामाङ छन् भने इमर्जिङ समूहमा दीपेश कँडेल, रुपेश सिंह, रिजन ढकाल, विपिन खत्री, देव खनाल, अर्जुन घर्ती र हेमन्त धामी छन्।
महिलातर्फको ग्रेड ‘ए’मा इन्दु वर्मा, रुविना क्षेत्री र सीता रानामगर छन् भने ग्रेड ‘बी’मा कविता कुँवर, ग्रेड ‘सी’मा पूजा महतो र अश्मिना कर्मचार्य छन्। त्यसैगरी ग्रेड ‘डी’मा अप्सरी बेगम, कविता जोशी, संगीता राई, काजोल श्रेष्ठ र बिन्दु रावल छन्।
इमर्जिङमा सोनी पाख्रिन, खुसी डंगोल, ज्योत्स्निका मरासिनी, कञ्चन श्रेष्ठ, रुवि पोदार, सृष्टि जैशी, सम्झना खड्का र सना प्रविन छन्। महिलातर्फको ‘ए’ ग्रेडका पर्ने खेलाडीलाई ५० हजार प्रदान गरिनेछ भने ‘बी’ ग्रेडलाई ३५ हजार, ‘सी’लाई ३० हजार, ‘डी’ लाई २५ हजार तथा इमर्जिङ समूहलाई २० हजार प्रदान गर्ने बैठकले निर्णय गरेको छ।
