तीन करोडभन्दा कम लागतका योजना प्रदेश र स्थानीय तहमा पठाउँछौं : प्रधानमन्त्री

अर्थतन्त्र

गृहपृष्ठ
अर्थतन्त्र

तीन करोडभन्दा कम लागतका योजना प्रदेश र स्थानीय तहमा पठाउँछौं : प्रधानमन्त्री

क्यापिटल नेपालशनिबार, फागुन १२, २०८०

काठमाडौं। प्रधानमन्त्री पुष्पकमल दाहाल ‘प्रचण्ड’ले तीन करोडभन्दा कम लागतका योजना संघमा नराखी प्रदेश र स्थानीय तहमा पठाइने बताएका छन्।

नेकपा माओवादी केन्द्रको संसदीय दलका नेतासमेत रहेका प्रधानमन्त्री प्रचण्डले पार्टीको आज सिंहदरबारमा भएको संसदीय दलको बैठकमा संघीयतालाई बलियो बनाउन वित्तीय हस्तान्तरणमा जोड दिइएको बताएका हुन्।

उनले भने, ‘कनिका छरे जसरी बजेट निर्माण गर्दा विकास र समृद्धि हासिल गर्न सकिँदैन। अलि रणनीतिक महत्त्वका योजना मात्र संघमा राख्छौं। तीन करोडभन्दा कम लागतका साना योजना प्रदेश र स्थानीय तहले नै सञ्चालन गर्छन्। बजेटको क्षेत्र तोकेर पठाइन्छ, आयोजना छनोटको अधिकार प्रदेश र स्थानीय तहलाई दिन्छौं।’

नयाँ योजना धेरै नथपीकन पूरा हुन बाँकी पुराना योजनामा बजेट विनियोजन गरिने उनले बताए। प्रधानमन्त्रीले बालकुमारी घटनाको प्रतिवेदन आफूले प्राप्त गरिसकेको र अध्ययनकै क्रममा रहेको जानकारी दिए।

उनले भने, ‘बालकुमारी घटनाको प्रतिवेदन अध्ययन गरेर निर्णय गरिन्छ। सरकारले आयोग बनाएर छानबिन गर्ने निर्णय गरेको हो, प्रतिवेदन अध्ययनको प्रक्रियामा छ। अध्ययनपछि आवश्यक निष्कर्षमा पुग्छौँ। यो सरकारको क्षेत्राधिकार हो। प्रतिपक्षले राजनीतिक संस्कार देखाउनुपर्छ।’

अब हुने मन्त्रिपरिषद् बैठकपछि सरकारका तर्फबाट संसद्मा विधेयक प्रस्तुत गरिने भएकाले ती विधेयक पारित गराउन सांसदलाई प्रधानमन्त्रीले आग्रह गरे।

प्रकाशित मिति: शनिबार, फागुन १२, २०८० १८:३०

प्रतिक्रिया दिनुहोस्