काठमाडौं। नेपाल उद्योग वाणिज्य महासंघ अध्यक्ष चन्द्रप्रसाद ढकालले बागमती प्रदेश मुकाम हेटौंडामा महासंघ बागमती प्रदेश कार्यालय शिलान्यास गरेका छन्।
कार्यालय निर्माणले स्थानीय व्यावसायिक समूहका लागि दूरगामी प्रभाव सिर्जना गर्ने अपेक्षा गरिएको छ। व्यावसायिक निर्माण सम्पन्न भएपछि आधुनिक कार्यालय, बैठक कोठा र सम्मेलन सुविधा उपलब्ध हुनेछ।
उद्यमी, स्टार्टअप र स्थापित व्यवसायले यी सुविधामार्फत व्यापार तथा व्यवसायलाई अझ प्रभावकारी रूपमा सञ्चालन गर्न, सहकार्य एवं सञ्जालका लागि प्रयोग गर्न सक्नेछन्।
-1708753511.jpeg?timestamp=1708753514290)
कार्यक्रममा अध्यक्ष ढकालले भवन व्यापार प्रवर्द्धन र नेटवर्किङको हब बन्ने लक्ष्य राखेको बताए। यसले स्थानीय उद्यम र अन्तर्राष्ट्रिय साझेदारबीचको सम्बन्धलाई बढावा दिन व्यापार मेला, उद्योग विशेष कार्यक्रम र वाणिज्य शिखर सम्मेलन आयोजना गर्नेछ।
कार्यालयमा बिजनेस इन्क्यूबेटर र एक्सेलेटरका लागि ठाउँ छुट्याइनेछ। स्टार्टअप र साना व्यवसायले उद्यमलाई विकास र स्तरोन्नति गर्न अभिमुखीकरण, प्रशिक्षण र स्रोत पहुँच स्थापित गर्न सक्नेछन्।
यसअनुरूप अनुकूल वातावरणले यस क्षेत्रको समग्र आर्थिक विकासमा योगदान दिने विश्वास महासंघ अध्यक्ष ढकालको छ।
कार्यक्रममा उद्योग वाणिज्य महासंघ–बागमती प्रदेश अध्यक्ष दिलसुन्दर श्रेष्ठले कार्यालयले सीप विकास कार्यक्रम प्रस्ताव गर्न व्यावसायिक प्रशिक्षण संस्थान र विश्वविद्यालयसँग सहकार्य गर्ने योजना बनाएको जानकारी दिए।
‘व्यावसायिक प्रतिस्पर्धाका लागि दक्ष जनशक्ति आवश्यक छ र यो पहलले सीपको खाडललाई पूरा गर्नेछ। यसले स्थानीय उत्पादन, हस्तकला र परम्परागत कला प्रदर्शनी ठाउँ पनि निर्धारण गर्नेछ। यो एक्सपोजरले स्थानीय कालिगढलाई मात्रै नभई पर्यटक र ग्राहकलाई पनि आकर्षित गर्नेछ’, उनले भने।
-1708753542.jpeg?timestamp=1708753544391)
महासंघले यस कार्यालयमार्फत अनुकूल व्यापार नीतिको पैरवी, नियामकीय चुनौती सम्बोधन र स्थानीय व्यवसायलाई कानुनी सहायता प्रदान गर्नेछ। निर्माण अघि बढ्दै जाँदा महासंघ बागमती कार्यालय यस क्षेत्रको आर्थिक उन्नति, उद्यमशीलता र सामुदायिक विकासको संवाहक बन्ने विश्वास महासंघ अध्यक्ष ढकालले व्यक्त गरे।
-1717671934-1727242094.jpg)
