पर्वत। मोदी गाउँपालिका–१ सेराबेंसीदेखि मुस्ताङको प्रसिद्ध धार्मिक स्थल मुक्तिनाथ जोड्ने केबुलकार निर्माण प्रक्रिया अघि बढेको छ।
विश्वकै लामो बहुचर्चित मुक्तिनाथ केबुलकारले पर्वत, बागलुङ र म्याग्दीको पर्यटन व्यवसायमा भने असर नगर्ने आयोजनाको दाबी छ। मुक्तिनाथका अध्यक्ष अरुणकुमार सुवेदीले केबुलकार निर्माणपछि यस क्षेत्रको पर्यटन व्यवसाय वृद्धि हुने बताए।
मुक्तिनाथ जाने पर्यटक पर्वत र कास्कीको सिमानास्थित सेराबेंसीबाट चढे पनि कुश्मा, बागलुङ र म्याग्दी क्षेत्रले पनि भरपुर लाभ लिन सक्ने उनको दाबी छ। ‘मुक्तिनाथ जाने पर्यटक पोखराबाट मात्रै आउँदैनन्, कालीगण्डकी करिडोर, मध्यपहाडी लोकमार्ग छँदै छ, अर्को बलेवा विमानस्थलमा भैरहवाबाट पर्यटक झर्ने सम्भावना हुन्छ’, उनले भने, ‘ती पर्यटक कुश्मा, बागलुङ र बेनीमा बस्छन्।’
केबुलकार कम्तीमा पनि दैनिक १० हजार जना आउजाउ गर्ने क्षमताको रहेको र त्यसमा मुक्तिनाथको यात्रा गराउने कम्पनीले पर्वतको गुप्तेश्वर तथा अल्पेश्वर गुफा, बागलुङको कालिका मन्दिर, पञ्चकोट, म्याग्दीको गलेश्वर मन्दिरमा प्याकेज बनाएर पु¥याउने व्यवस्था हुने भएका कारण पनि यस क्षेत्रले प्रचुर फाइदा लिन सक्ने सुवेदीको भनाइ छ।
अध्यक्ष सुवेदीले लगानीको स्रोत सुनिश्चित भइसके पनि सरकारी प्रक्रियाको ढिलाइले निर्माणको काम पछि धकेलिएको बताए। २० प्रतिशत स्वदेशी र ८० प्रतिशत भारतको के एन्ड आर इञ्जिनियरिङ लिमिटेडले केबुलकार निर्माणका साथै लगानीसमेत गर्ने गरी सुनिश्चित भए पनि नेपालको कानुनी प्रक्रियाले प्रक्रिया पूरा गर्न काम गरिरहेको उनले जानकारी दिए।
सुवेदीका अनुसार विश्वकै लामो मुक्तिनाथ केबुलकार इञ्जिनियरिङ प्रक्युमेन्ट कन्ट्रयाक्ट र लगानी (इपिसिएफ) मोडलमा केबुलकार बनाउन लागिएको हो।
इपिसिएफ मोडेलबाट बन्न लागेको केबलकार नेपालकै पहिलो ठूलो परियोजना भएको जनाउँदै ८० किलोमिटर लामो केबलकार बनाउन ५५ अर्ब लागत अनुमान गरिएको बताए। समझदारीअनुसार कूल लागतको ८० प्रतिशत अर्थात् ४४ अर्ब के एन्ड आर इन्जिनियरिङ भारतले लगानी गर्नेछ।
आयोजनाको वातावरणीय मूल्यांकन प्रतिवदेन पास हुन र सरकारसँग आयोजना विकास सम्झौता गर्न भने अझै बाँकी छ। चार धाममध्ये दर्शनका लागि मुक्तिनाथ पुग्नैपर्ने धार्मिक मान्यताअनुसार मुक्तिनाथ जाने धार्मिक पर्यटकको उपस्थिति बढ्ने उनको भनाइ छ।–रासस
