काठमाडौं। पछिल्लो एक महिनामै निक्षेपकर्ताले एनआइसी एसिया बैंकबाट १४ अर्ब रुपैयाँ निक्षेप निकालेका छन्।
नेपाल बैंकर्स संघले उपलब्ध गराएको निक्षेप विवरणअनुसार एनआइसी एसियाको पुसमा ३ खर्ब ८१ अर्ब ४० करोड रुपैयाँ थियो। तर, माघमा भने ३ खर्ब ६७ अर्ब ६८ करोडमा खुम्चिएको छ।
वाणिज्य बैंक क्षेत्रको निक्षेप करिब १२ अर्ब रुपैयाँले बढ्दा एनआइसीको भने घटेको हो। बैंकहरुको माघमा ५४ खर्ब २९ अर्ब ६९ करोड रुपैयाँ निक्षेप थियो। तर, माघमा ५४ खर्ब ४१ अर्ब २६ करोड रुपैयाँ पुगेको छ।
एनआइसी एसियाप्रति फैलिएका विभिन्न किसिमका अफवाह, सर्वसाधारणले बैंकलाई हेर्ने दृष्टिकोण, सञ्चार माध्यममा आएका विभिन्न टीकाटिप्पणी र बैंककै कतिपय गतिविधिका कारण ग्राहकको बैंकप्रतिको मनोबल गिरेको असर निक्षेपमा परेको हो।
कतिपय उच्छृंखल व्यक्तिहरुले जतिसुकै बेला सहकारीजस्तै बैंक डुब्न सक्छ भनेर चलाएको भ्रामक अफवाह र त्यसैका पछि दौडिने नेपाली मनोविज्ञानले एनआईसी एसियाको निक्षेप बाहिरिन पुगेको हो।
अझै पनि एनआइसी एसियाका विषयमा आएका भ्रामक गतिविधिलाई निस्तेज नपारे आगामी दिनमा झन् ठूलो धक्का लाग्नेछ।
खासगरी चालू आर्थिक वर्षको दोस्रो त्रैमासिक वित्तीय विवरणमा उल्लेख भएका कतिपय विषयवस्तु, शाखा बन्द गर्न राष्ट्र बैंकमा दिएको निवेदन, नायब प्रमुख कार्यकारी अधिकृत सुधीरनाथ पाण्डेको राजीनामालगायत विषयमा बैंकबाट एकोहोरो रुपमा गरिएको भ्रामक खण्डनले पनि यसको छविलाई धुमिल्याउन मद्दत गरेको छ।
बैंकले पनि उच्छृंखल व्यक्तिले जस्तै विभिन्न सूमह बनाएर आफ्नो पक्षमा एकोहोरो गरेको प्रचार–प्रसारले निक्षेपकर्ता थप दिगकभ्रमित भई निक्षेप निकाल्न थालेपछि अप्ठेरो अवस्था आएको हो।
चालू आवको सुरुदेखि नै निक्षेप बढ्दै आएको थियो। साउनमा ३११ अर्ब रहेकामा भदौमा ३४७ अर्ब निक्षेप पुगेको थियो। त्यसैगरी असोजमा ३६४ अर्ब पुग्दा कात्तिकमा ३७६ अर्ब भएको थियो। मंसिरमा ३८० हुँदा पुसमा ३८१ अर्ब पुगेको थियो।
७ महिने अवधिमा एनआइसी एसियाको पहिलो पटक ठूलो मात्रामा निक्षेप घटेको देखिन्छ। अर्कोतिर एनआइसी एसियाले साउनसम्म २ खर्ब ६८ अर्ब ६४ करोड रुपैयाँ लगानी गरेकामा माघमा आइपुग्दा २ खर्ब ९८ अर्ब ४३ करोड रुपैयाँ छ। जबकि पुसमा ऋण लगानी ३ खर्ब २ अर्ब ६६ करोड थियो।
त्यसअघि असोजमा ३ खर्ब ३ अर्ब ४१ करोड रुपैयाँ ऋण लगानी भएकामा कात्तिक र मंसिरमा घटेर ३ खर्ब १९ करोडमा सीमित भयो।
