काठमाडौं। नेपालमा जिपलाइनको लहर ल्याउने धुलिखेल जिपलाइन ५ वर्ष पूरा भएको छ। सन् २०१९ को फेब्रुअरी १४ बाट सञ्चालनमा आएको यस जिपलाइनले ५ वर्षको अवधिमा सरकारका उच्च प्रतिनिधिदेखि कलाकार हुँदै सर्वसाधारणसम्ममा यसको क्रेज बसाल्न सफल भएको छ।
समुन्द्री सतहबाट एक हजार तीन सय मिटर उचाइमा रहेको टप स्टेसनबाट सुरु भएको यात्रा बटम स्टेसनमा पुग्दा एक सय मिटर मात्रै तल झर्छ। यस बीचमा दुई सय ४० फिटको ‘भर्टिकल ड्रप’ हुने गरी डोरी टाँगिएको छ। यसमा उडिरहँदा नजिकका खेतबारी, जङ्गलको हरियालीसँगै लाङटाङ, दोर्जे लाक्पा, फुर्बीच्याचु लगायतका हिमालको समेत दृश्यावलोकन गर्न सकिन्छ।
५ वर्षअघि सिन्धुपाल्चोकका केदार थापा र काठमाडौंका भुपेश श्रेष्ठले जिपलाइन लगायतका परियोजना बनाएका थिए। त्यसपछि सबैको आकर्षण बनेको जिपलाइन बिस्तारै विदेशीलाई मात्रै नभई नेपालीलाई समेत बानी पर्दै गयो। देशैभर जिपलाइनको माहोल बन्यो। अहिले मुलुकका धेरै ठाउँमा जिपलाइन सुरु भएको सञ्चालक कार्कीको भनाई छ।
नेपालमा धुलिखेल जिपलाइन पहिलो नभएपनि सबैको पहुच पुगेको र धेरैलाई थाहाँ भएको भने यहि नै पहिलो भएको थापाको भनाई छ। धुलिखेल जिपलाइन सुरु भएपछि अहिले सञ्चालक थापा मुलुकका विभिन्न भागमा निर्माण एवंम सञ्चालन गर्दै विज्ञको रुपमा काम गर्दै आएका छन्।
वल्र्ड–वाइड एडभेन्चर प्रालिले सञ्चालनमा ल्याएको धुलिखेल जिपलाइनमा प्रधानमन्त्री पुष्पकमल दाहालदेखि अन्य नेता तथा कलाकार समेतले मनोरञ्जन लिइसकेका छन। बागमती प्रदेशका भौतिक पूर्वाधार विकास मन्त्री युवराज दुलाल, राष्ट्रिय सभा अध्यक्ष गणेश तिमिल्सिना, क्याप्टेन विजय लामा, कलाकार वर्षा सिवाकोटी, पूजा शर्मा, अनमोल केसी, कमेडियन मनोज गजुरेल, गायिका रचना रिमाल, गायक प्रताप दास लगायतले धुलिखेल जिपलाइनमा मनोरञ्जन लिइसकेका छन।
राजधानी काठमाडौंबाट ३५ किलोमिटर मात्रै भएकाले पनि धुलिखेल उपत्यकाबासीको सहज गन्तव्य हो। सर्वसुलभ मूल्य धुलिखेल जिपलाइनको अर्को आकर्षण बनेको छ।
काठमाडौंबाट नजिकैको दूरीमा रहेको धुलिखेलमा क्लासिक जिपलाइन, उडेझैं खेल्न मिल्ने सुपरम्यान जिपलाइन र टेण्डम (दुई जनासँगै खेल्न मिल्ने) जिपलाइनको मज्जा लिन मिल्ने भएकाले पनि यो सबैको रोजाइमा परेको धुलिखेल जिपलाइनका प्रमुख कार्यकारी अधिकृत(सईओ)भुपेश श्रेष्ठ बताउँछन्।
३ हजार रुपैयाँमै फोटो, भिडिओसहित जिपलाइन खेल्न पाइने भएपछि यसको लोकप्रियता पनि ह्वात्तै बढेको हो। सुपरम्यान र टेण्डम जिपलाइन नेपालमै पहिलोपटक धुलिखेलमा सुरू गरिएको हो।
धुलिखेल नगरपालिकाको थाक्लेदेखि ११ सय मिटरको जिपलाइनले पाँचखालको खावालाई जोडेको छ। दैनिक सय जनाले सेवा लिन सक्ने जिपलाइन औसत ७५ किमि प्रतिघण्टाको गतिमा हुत्तिन्छ।
