काठमाडौं। एनआइसी एसिया बैंकले कम्तीमा ५० शाखा र एक दर्जन विस्तारित (एक्सटेन्सन) काउन्टर बन्द गर्ने भएको छ। आर्थिक मन्दीका कारण व्यावसायिक गतिविधिमा धक्का लागेपछि बैंकले विभिन्न ठाउँका शाखा बन्द गर्न नेपाल राष्ट्र बैंकमा निवेदन दिएको हो।
केन्द्रीय बैंकले अनुमति दिए एनआइसी एसियाका व्यवसाय कम भएका शाखा बन्द गर्न बाटो खुल्नेछ। तर, एनआइसी एसियाले भने विस्तारित काउन्टर मात्रै बन्द गर्न निवेदन दिएको दाबी गरेको छ।
सरकारका विभिन्न मन्त्रालय, विभाग तथा कार्यालयमा विस्तारित काउन्टर बन्द गर्न राष्ट्र बैंकमा निवेदन दिएको बैंकका सूचना अधिकारी अर्जुन खनियाँले जानकारी दिए।
तर, राष्ट्र बैंक स्रोतका अनुसार ग्रामीण क्षेत्रका शाखामा सञ्चालन खर्च अत्यधिक रहेको र व्यवसाय खासै नभई बढी मात्रा घाटामा गएका शाखा बन्द गर्न निवेदन आएको जनाएको छ।
‘स्थानीय सरकारको खाता सञ्चालनका लागि विस्तारित काउन्टर सरकारी खाता हाम्रो बैंकमा नआउने भएपछि बन्द गर्ने प्रकृया अघि बढाएका छौं,’ बैंकका सूचना अधिकारी खनियाँले भने, ‘काठमाडौं उपत्यकाभित्र र बाहिर गरी करिब १२ वटा यस्ता काउन्टर बन्द गर्न राष्ट्र बैंकमा निवेदन दिएका छौं।’
केन्द्रीय बैंकले अनुमति दिए एनआइसी एसियाका व्यवसाय कम भएका शाखा बन्द गर्न बाटो खुल्नेछ। तर, एनआइसी एसियाले भने विस्तारित काउन्टर मात्रै बन्द गर्न निवेदन दिएको दाबी गरेको छ।
स्थानीय सरकारका खाता एनआइसी एसिया बैंकको विस्तारित काउन्टर राखिनुअघि नै अन्य वाणिज्य बैंकमा भएको हुँदा सरकारले एनआइसीमा खाता नसार्दा काउन्टर बन्द गर्न लागेको उनको भनाइ छ। ‘हामी पुग्नुअगावै अन्य वाणिज्य बैंकमा खाता भएका काउन्टरमा सरकारी खाता नखुल्ने पक्का भएपछि काउन्टरै बन्द गर्न लागेका हौं’, उनले भने।
सरकारले बिजनेस नदिने पक्का हुँदै गएपछि एनआइसी एसियाले यसअघि पनि स्थानीय सरकार र मातहतका सरकारी कार्यालयमा भएका विस्तारित काउन्टर बन्द गरिरहेको छ। बिजनेस नभएका स्थानमा कार्यालय खर्च मात्रै हुने देखेपछि काउन्टर बन्द गर्न राष्ट्र बैंकमा निवेदन दिइएको खनियाँको भनाइ हो।
हालसम्म बैंकले ३६० शाखा, ६४५ एटिएम, ११० वटा विस्तारित काउन्टर र ६१ शाखारहित इकाइबाट बैंकिङ सेवा दिँदै आएको छ।
