सहरी सचिवमा गेलाल दोहोरिए, वैद्यको सरुवा प्रधानमन्त्री कार्यालय

समाज

गृहपृष्ठ
समाज

सहरी सचिवमा गेलाल दोहोरिए, वैद्यको सरुवा प्रधानमन्त्री कार्यालय

क्यापिटल नेपालमंगलबार, माघ २३, २०८०

काठमाडौं। सहरी विकास मन्त्रालयको सचिवमा मणिराम गेलाल दोहोरिएका छन्। माघ १८ को मन्त्रिपरिषद् बैठकले सचिव गेलाललाई सहरी मन्त्रालयमा दोहोर्याएको हो। सहरी सचिवको रुपमा रहेका सरजुकुमार वैद्य प्रधानमन्त्री तथा मन्त्रिपरिषद् कार्यालय सरुवा भएका छन्।

सचिव गेलाले यसअघि २०७८ मा सहरीमन्त्री रामकुमारी झाक्री हुँदा करिब ३ महिना सहरी सचिवको भूमिकामा थिए। २०७९ चैत १७ बाट सीता गुरुङ मन्त्री बनेकी छन्।

सहरीमन्त्री बनेको करिब डेढ महिना (२०८० वैशाख २९) मै तत्कालीन सचिव सुरेश आचार्यलाई हटाएर रवीन्द्रनाथ श्रेष्ठलाई गुरुङले मन्त्रालय ल्याएकी थिइन्। सचिव श्रेष्ठको २०८० असोज १० मा अनिवार्य अवकाशसँगै असोज २९ बाट सरजुकुमार वैद्यलाई सचिवमा ल्याएकी थिइन्।

तर, वैद्यलाई पनि करिब साढे ४ महिनामै मन्त्री गुरुङले सरुवा गरेर गेलालाई ल्याएकी हुन्। सचिव गेलालले बुधबार वा बिहीबार मन्त्रालय हाजिर हुने जनाएका छन्। ‘१८ गतेको मन्त्रिपरिषद् बैठकले मलाई सहरी मन्त्रालयमा दोहोर्याउने निर्णय गरेको हो, भोलि वा पर्सि हाजिर हुन्छु,’ सचिव गेलाले भने।

प्रकाशित मिति: मंगलबार, माघ २३, २०८० १७:१७

प्रतिक्रिया दिनुहोस्