काठमाडौं। डायमन्ड (हिरा)को अन्तर्राष्ट्रिय ब्रान्ड अजाया नेपाल र दुबईको अल अली ग्रुपले व्यावसायिक साझेदारी सम्झौता गरेका छन्। अजाया ब्रान्डलाई विश्व बजारमा लैजाने र नेपालमा पर्यटन व्यवसायमा साझेदारी गर्ने उद्देश्यले दुई व्यापारिक समूहले समझदारीपत्र (एमओयू) मा हस्ताक्षर गरेका हुन्।
अल अली ग्रुपका कार्यकारी अध्यक्ष याकुव अल अली र अजाया नेपालका राकेशकुमार अडुकियाले समझदारीपत्रमा हस्ताक्षर गरे।
यो समझदारीले विज्ञता र लगानीलाई एकै ठाउँ ल्याएको हुँदा अजायाले छोटो समयमै विश्व बजारमा पहिचान बनाउने अपेक्षा गरिएको छ।
त्यसैगरी विश्वकै चर्चित पर्यटन गन्तव्य दुबईको अनुभवी एवं प्रतिष्ठित कम्पनीलाई नेपालको पर्यटन क्षेत्रमा लगानी गर्न समझदारीले प्रोत्साहित गर्नेछ। विश्व बजारमा नेपाली हस्तकलाको प्रवर्द्धनमा पनि यो समझदारी कोसेढुंगा बन्न सक्ने अपेक्षा गरिएको छ।
समझदारीबारे अजायाका राकेश अडुकियाले भने, ‘अजाया हामीले डायमन्डमा हासिल गरेको विशेषज्ञताका आधारमा अघि बढाइएको ब्रान्ड हो। यसलाई नेपालमा मात्रै नभएर विश्व बजारमै स्थापित गर्ने लक्ष्य छ। अल अली ग्रुपसँगको साझेदारीले लगानी र विशेषज्ञतालाई एकै ठाउँ ल्याउने काम गरेकाले यो नेपाली ब्रान्ड छोटो समयमै विश्व बजारमा स्थापित हुने अपेक्षा गरेका छौं।’
त्यसैगरी ठूलो सम्भावना रहेको नेपालको पर्यटन क्षेत्रमा विदेशी लगानी भित्र्याउन पनि यो समझदारीले सहयोग गर्ने उनले बताए। निकट भविष्यमै अल अली ग्रुप र अजायाको संयुक्त लगानीका उद्योगमार्फत पर्यटन क्षेत्रमा प्रवेश गरिने उनको भनाइ छ।
अल अली ग्रुपका कार्यकारी अध्यक्ष याकुव अल अलीले नेपालको पर्यटन क्षेत्रमा लगानी गर्ने आफ्नो समूहको चाहनालाई मूर्त रुप दिन समझदारी कोसेढुंगा सावित हुने बताए। ‘नेपालको पर्यटन क्षेत्रमा हामीले ठूलो सम्भावना देखेका छौं। अल अली ग्रुप पर्यटन र अतिथि सत्कार क्षेत्रको लामो अनुभवलाई नेपालमा पनि लगानी गर्न चाहन्छ। यो समझदारी र अजायासँगको हातेमालोले हामीलाई उत्साहित बनाएको छ,’ उनले भने।
