काठमाडौं। भौतिक पूर्वाधार तथा यातायातमन्त्री प्रकाश ज्वालाले नारायणगढ–बुटवल सडक विस्तार निर्धारित समयमा पूरा गर्न ठेकेदार कम्पनी चाइना स्टेट कन्स्ट्रक्सन इन्जिनियरिङ कर्पोरेसन लिमिटेड (सिएससिइसी) लाई निर्देशन दिएका छन्। म्याद थपिएको समयभित्र काम सम्पन्न नभए पुनः म्याद नथपिने पनि उनले स्पष्ट पारेका छन्।
सोमबार पश्चिम नवलपरासी क्षेत्र १ बाट निर्वाचित सांसद विनोद चौधरीको विशेष पहलमा मन्त्री, चिनियाँ ठेकेदार, सडक विभागका महानिर्देशक, सांसद र स्थानीय तहका जनप्रतिनिधिसमेतको बैठकमा पूर्वाधार मन्त्री ज्वालाले उक्त निर्देशन दिएका हुन्।
‘अब समयमा काम सक्नैपर्छ। अन्यथा ठेक्का तोड्नुपर्ने अवस्था आउन सक्छ। अब हामीले कुनै कारणले यो परियोजनामा ढिलाई भएको सहन सक्ने अवस्था छैन,’ मन्त्री ज्वालाले चिनियाँ ठेकेदारलाई निर्देशन दिए।
बैठक संयोजन गरेका सांसद चौधरीले ठेकेदारले प्रत्येक महिना लक्ष्यअनुसार काम गर्नुपर्ने र लक्ष्य पूरा नगरे उसको रकमबाट कट्टा हुने गरी अर्को ठेकेदारलाई जिम्मेवारी दिने व्यवस्था मिलाउन मन्त्रीलाई आग्रह गरे। ‘ठेकेदार कम्पनीले पटक–पटक प्रतिबद्धता जनाउने तर पूरा नगर्ने विषय अब सह्य नहुने भन्दै सांसद चौधरीले लक्ष्यअनुसार काम नगर्ने ठेकेदारबाट ‘डयामेज क्लेम’ गरी उसकै पैसामा अन्य ठेकेदारलाई परिचालन गर्न ढिलाइ गर्न नहुने बताए।
‘नारायणगढ–बुटवल सडक तत्काल मर्मतसम्भार गरी सहज रुपमा गाडी आउजाउ हुने वातावरण बनाउनुपर्छ। यो काम अधिकतम एक महिनाभित्र भइसक्नुपर्छ,’ सांसद चौधरीले ठेकेदारलाई भने, ‘सन् २०२४ को सेप्टेम्बरसम्म सम्पूर्ण काम सक्नुपर्छ। स्थानीयले धेरै दुःख पाइसके। अब हामीले कुनै हालतमा छुट दिन सक्दैनौं।’
मन्त्री ज्वालाले सडक निर्माण गरिरहँदा मर्मतसम्भार गर्ने र सडकमा सहज आवागमन व्यवस्था मिलाउने सर्त ठेक्कामा रहेकाले अहिले ठेकेदारले गरिरहेको व्यवहार सम्झौता विपरीत रहेको भन्दै सम्झौताका सर्त पालना गर्न निर्देशन दिए। सडक कालोपत्रे गर्दा एकापट्टिको दुई लेन सडक पहिले सम्पन्न गरी त्यसपछि बाँकी लेनमा काम गर्न पनि ठेकेदारलाई उनले निर्देशन दिए।
-1707132184.jpg?timestamp=1707132184936)
ठेकेदारलाई रकम निकासमा समस्या नरहेको, निर्माण सामाग्रीको अभाव नरहेको र विद्युत् पोल र तार व्यवस्थापन भएको अवस्थामा सडक निर्माणको काममा किन प्रगति भएन भन्ने कुरालाई सरकारले गम्भीरतापूर्वक लिएको बताए।
संसद्को भौतिक पूर्वाधार विकास समितिका सभापति दीपकबहादुर सिंहले ठेकेदारलाई चीनमा पनि यस्तै गतिमा काम गरेको भए के हुन्थ्यो भन्ने प्रश्न गर्दै ठेकेदार कम्पनीले चिनियाँ कन्ट्रयाक्टरको बदनाम गरेको दाबी गरे। बैठकमा सांसद, नवलपरासीका स्थानीय निकायका प्रमुख र प्रोजेक्टमा संलग्न कर्मचारी सहभागी थिए।
निर्देशनअनुसार काम भए नभएको अनुगमन गर्न एक महिनामा आज बैठकमा सहभागी सबै पक्ष सडक निर्माण स्थलमा जाने सहमति पनि भएको छ।
बर्दघाट–सुनवल बजारमा फागुनभित्रै कालोपत्रे गरिने
पश्चिम नवलपरासी क्षेत्र १ का सांसद विनोद चौधरीले ठेकेदारलाई बर्दघाट–सुनवल बजारमा कहिलेसम्म कालोपत्रे गर्ने हो, स्पष्ट रुपमा समयसीमा चाहियो भनेर प्रश्न गरे। सांसद चौधरीको प्रश्नपछि ठेकेदार कम्पनीका प्रतिनिधिले फागुन मसान्तभित्र बर्दघाट–सुनवल बजारमा कालोपत्रे गरिसक्ने जानकारी दिए।
सांसद चौधरीले ठेकेदार कम्पनीले भनेअनुसार यसलाई कार्यान्वयन गर्न दुम्कीबास–बुटवल सडक खण्डका प्रोजेक्ट हेड शशांक मिश्रलाई निर्देशन दिए। चिनियाँ ठेकेदार र सडक विभागबाट खटिएका प्रोजेक्ट हेड दुवै जनाले फागुनभित्र काम सक्ने प्रतिबद्धता जनाएका छन्।
‘फागुन अन्तिममा दुवै जनासँग बर्दघाटमा भेट्नेछु। काम पूरा भएन भने तपार्ईहरूमाथि कारबाही गरिनेछ’, सांसद चौधरीले दुवैतर्फका जिम्मेवार अधिकारीलाई निर्देशन दिँदै भनें, ‘नवलपरासीका नागरिकले धेरै सास्ती भोगेका छन्। अब पनि ढाँटछल गर्ने काम भयो भने मलाई सह्य हुने छैन।’
-1717671934-1727242094.jpg)
