काठमाडौं। अन्तर्राष्ट्रिय मुद्राकोष (आईएमएफ)ले विश्व अर्थतन्त्र सकारात्मक दिशातिर हिँडिरहे पनि जोखिम कायमै रहेको बताएको छ। अर्थतन्त्रले वृद्धिको पूर्वानुमानित लक्ष्य प्राप्ति गरे पनि अझै सम्भावित जोखिमप्रति सचेत हुन आवश्यक रहेको आइएमएफले बताएको हो।
आईएमएफका प्रबन्ध निर्देशक क्रिस्टालिना जर्जिएवाले आइएमएफले विश्वव्यापी वृद्धिको पूर्वानुमानित लक्ष्य प्राप्ति गरेको तर सम्भावित जोखिम भने अझै रहेको जनाइन्।
अमेरिकाको वासिङ्टन डिसीमा अवस्थित आइएमएफ मुख्यालयमा बिहीबार आयोजित पत्रकार सम्मेलनमा प्रमुख जर्जिएवाले रुस–युक्रेन र इजरायल–हमासबीच द्वन्द्व जारी रहँदा जटिल भूराजनीतिक अवस्थाले अझै पनि विश्वव्यापी आर्थिक परिदृश्यमा अनिश्चितता ल्याएको बताइन्।
आइएमएफले सन् २०२४ मा विश्वव्यापी आर्थिक वृद्धिको अनुमान ३.१ प्रतिशतमा पुर्याएको छ। सन् २०२३ को अक्टुबरमा गरिएको अनुमानभन्दा यो ०.२ प्रतिशत बढी हो।
मध्यपूर्वको ढुवानी अवरोधबारे बोल्दै उनले जनवरीमा स्वेज नहरमा जाने कार्गो एक वर्ष अघिको तुलनामा ४३ प्रतिशतले घटेको बताउँदै यसले सम्बन्धित मुलुकको अर्थतन्त्रमा धक्का दिएको जनाइन्।
उनले मौद्रिक नीतिमा निर्धारित समयभन्दा अगाडि तथा पछाडि हुन सक्ने जोखिमका साथै विस्तारित अवधिका लागि उच्च ब्याज दर कायम राख्ने जोखिम उल्लेख गरिन्।
आवश्यकभन्दा लामो समयसम्म ब्याज दर राख्ने जोखिम अमेरिकी अर्थतन्त्रका लागि मात्र नभई विश्वव्यापी अर्थतन्त्रका लागि समेत जोखिम रहेको उनको भनाइ छ।
जर्जिएवाले पछिल्लो समय उदीयमान अर्थतन्त्रले मुद्रास्फीतिलाई लक्ष्यमा ल्याएको बताउँदै परिणामस्वरुप निर्धारित समय अगावै कम ब्याजदरमा सर्ने र अमेरिकी दर उच्च रहेमा यसले विनिमय दरलाई असर गरी अन्य देशलाई नकारात्मक प्रभाव छोड्न सक्ने उल्लेख गरिन्।
उनले चिनियाँ अर्थतन्त्रले सन् २०२३ मा अपेक्षाभन्दा माथि प्रदर्शन गरेको बताइन्। उनले घरजग्गा क्षेत्रको तनावलगायत चुनौतीलाई निर्णायक रूपमा सम्बोधन गर्नु र स्थानीय सरकारको ऋण व्यवस्थापन गर्नु चीनको आर्थिक गति कायम राख्नका लागि महत्त्वपूर्ण रहेको धारणा व्यक्त गरिन्।
सम्पत्ति क्षेत्रमा चिनियाँ सरकारले केही कदम चालेको जर्जिएवाले बताउँदै हरित अर्थतन्त्रप्रति चीनको प्रतिबद्धता खासगरी विद्युतीय सवारीजस्ता क्षेत्रमा उल्लेखनीय रहेको उनले बताए।–एजेन्सी
-1732445197.jpg)
