योजना आयोग सदस्यमा उमाशंकर, नेवानि उपाध्यक्षमा विक्रम राई नियुक्त

अर्थतन्त्र

गृहपृष्ठ
अर्थतन्त्र

योजना आयोग सदस्यमा उमाशंकर, नेवानि उपाध्यक्षमा विक्रम राई नियुक्त

क्यापिटल नेपालबिहीबार, माघ १८, २०८०

फाइल तस्बिर

काठमाडौं। सरकारले राष्ट्रिय योजना आयोगको रिक्त सदस्य पदमा रौतहटका उमाशंकर प्रसादलाई नियुक्त गरेको छ। आयोगमा यसअघि एक उपाध्यक्ष र ६ जना सदस्य रहने व्यवस्था थियो। तर, सरकारले आयोगमा हालै सदस्य थप गरी सात बनाउने निर्णय गरेअनुसार उमाशंकरलाई नियुक्त गरिएको हो।

सत्तारुढ जनता समाजवादी पार्टी (जसपा) निकट रहेका उमाशंकरलाई अध्यक्ष उपेन्द्र यादवको सिफारिसमा आयोग सदस्य नियुक्त गरिएको बुझिएको छ। रौतहटका उमाशंकर भारतको दिल्लीस्थित जेएनयूबाट पीएचडी होल्डर हुन् भने त्रिभुवन विश्वविद्यालय पढाउँछन्।

आज सिंहदरबारमा बसेको मन्त्रिपरिषद् बैठकले उद्योग, वाणिज्य तथा आपूर्तिमन्त्री रमेश रिजालको अध्यक्षतामा निजी क्षेत्रको पनि प्रतिनिधित्व हुने गरी राष्ट्रिय व्यापार सहजीकरण समिति गठन गर्ने निर्णय गरेको सञ्चारमन्त्री एवं सरकारी प्रवक्ता रेखा शर्माले जानकारी दिइन्।

बैठकले नेपाल वायुसेवा निगमको रिक्त उपाध्यक्ष पदमा सञ्चालक सदस्य विक्रम राई तथा नरदेवी आयुर्वेद चिकित्सालय विकास समिति सदस्यमा सिन्धुपाल्चोकका लेखनाथ लामा र काठमाडौंका डा साहरा श्रेष्ठलाई मनोनयन गरेको छ।

बैठकले सुरक्षित कारोबार ऐन, २०६३ लाई संशोधन गर्न बनेको विधेयक संघीय संसद्मा पेस गर्न स्वीकृति दिएको शर्माले बताइन्।

प्रकाशित मिति: बिहीबार, माघ १८, २०८० १३:१३

प्रतिक्रिया दिनुहोस्