‘इमर्जिङ नेपाल इन्भेस्टमेन्ट समिट’को नाममा हुनेछ लगानी सम्मेलन, लोगो पनि टुंग्याइयो

अर्थतन्त्र

गृहपृष्ठ
अर्थतन्त्र

‘इमर्जिङ नेपाल इन्भेस्टमेन्ट समिट’को नाममा हुनेछ लगानी सम्मेलन, लोगो पनि टुंग्याइयो

क्यापिटल नेपालमंगलबार, माघ १६, २०८०

काठमाडौं। सरकारले आगामी वैशाख १६ र १७ मा राजधानीमा आयोजना गर्ने तय भएको तेस्रो लगानी सम्मेलनको नाम र लोगो टुंग्याएको छ। सम्मेलनलाई ‘इमर्जिङ नेपाल इन्भेस्टमेन्ट समिट–२०२४’ नाम दिइएको सम्मेलन सचिवालयले जनाएको छ।

लगानी सम्मेलन निर्देशक समितिको दोस्रो बैठकले लगानी सम्मेलनको लोगो टुंगो लगाएको सचिवालय सहसचिव एवं लगानी बोड प्रवक्ता प्रद्युम्नप्रसाद उपाध्यायले जानकारी दिए।

लगानी सम्मेलन आयोजना गर्न सरकारले अर्थमन्त्रीको संयोजकत्वमा निर्देशक समिति, मुख्यसचिवको नेतृत्वमा कार्यान्वयन समिति, उद्योग, वाणिज्य तथा आपूर्ति मन्त्रालयका सचिवको संयोजकत्वमा प्राविधिक समिति गठन गरेको छ। लगानी बोर्डका प्रमुख कार्यकारी अधिकृतको संयोजकत्वमा लगानी सम्मेलन सचिवालय रहेको छ।

लगानी सम्मेलनका लागि कानुनी सुधारको सिफारिस गर्न गठित कार्यदलले विभिन्न एक दर्जन ऐन तथा नियमावली संशोधन गर्न सिफारिस गरेको छ।

प्रधानमन्त्री तथा मन्त्रिपरिषद् कार्यालयअन्तर्गत आर्थिक तथा पूर्वाधार क्षेत्र हेर्ने सचिवको संयोजकत्वमा गठित मौजुदा नीतिगत, संरचनागत एवं प्रक्रियागत सुधारका लागि सुझाव कार्यदलले आफ्नो प्रतिवेदन बुझाइसकेको छ।

सम्मेलनका लागि पूर्वतयारीका काम भइरहेका छन्। लगानी बोर्डको कार्यालयले गत शुक्रबार नेपालमा लगानी सम्भाव्यता पहिचान र आर्थिक विकासका लागि समन्वयात्मक रणनीति शीर्षकमा कार्यशाला आयोजना गरेको थियो।

प्रकाशित मिति: मंगलबार, माघ १६, २०८० १२:४७

प्रतिक्रिया दिनुहोस्