काठमाडौं। नेपाल चेम्बर अफ कमर्सका अध्यक्ष राजेन्द्र मल्लले मुलुकको आर्थिक समृद्धिका लागि कृषिमा आत्मनिर्भर हुनुपर्ने बताएका छन्। कृषिमा परनिर्भरता नहटेसम्म आर्थिक समृद्धि हासिल गर्ने सरकारी नीति र लक्ष्य कागजमै सीमित हुने उनको भनाइ छ।
कृषिजन्य वस्तु उत्पादन र बजारीकरणका लागि तीनै तहका सरकार र निजी क्षेत्रका संगठनबीच प्रभावकारी समन्वय हुनुपर्नेमा अध्यक्ष मल्लले जोड दिए।
दोलखा चेम्बर अफ कमर्सको पाँचौं साधारणसभा उद्घाटन गर्दै अध्यक्ष मल्लले विद्यमान व्यापार घाटा कम गर्न कृषि एवं खानीजन्य वस्तुको पहिचान एवं प्रवद्र्धनसँगै निर्यात सहजीकरण हुनुपर्नेमा जोड दिए।
अध्यक्ष मल्लले भने, ‘कृषि उत्पादनको दृष्टिकोणले सबै जिल्लाको आ–आफ्नै विशिष्टकृत महत्त्व छ। स्थानीय उत्पादनको प्रवद्र्धन एवं बजारीकरणका लागि ठोस नीतिगत व्यवस्थाको खाँचो छ।’
कृषिप्रधान मुलुकमा खाद्यान्नसमेत आयात गर्नुपर्ने अवस्था आउनु दुर्भाग्य भएको भन्दै अध्यक्ष मल्लले स्थानीय कृषि उपजको उत्पादन वृद्धि एवं सहज बजारीकरणका लागि जिल्लामा छुट्टै कक्ष निर्माण गर्नुपर्नेमा जोड दिए।
उनले भने ‘आन्तरिक उत्पादन नहुँदा कृषिजन्य वस्तुमा समेत परनिर्भरता बढ्दो क्रममा छ। सम्भावना भएका क्षेत्रमा समेत निर्यात सहजीकरण हुन सकेको छैन।’
निर्यात वृद्धि गरेर व्यापार घाटा कम गर्ने हो भने कृषि, खानी, जलविद्युत्, पर्यटन र सूचना प्रविधियुक्त क्षेत्रलाई पहिलो प्राथमिकतामा राखेर नीति योजना बनाउनुपर्नेमा अध्यक्ष मल्लले जोड दिए।
