रिडी पावर र अरुण भ्याली हाइड्रोपावरलाई हकप्रद निष्कासन अनुमति

सेयर

गृहपृष्ठ
सेयर

रिडी पावर र अरुण भ्याली हाइड्रोपावरलाई हकप्रद निष्कासन अनुमति

क्यापिटल नेपालआइतबार, पुस २२, २०८०

काठमाडौं। नेपाल धितोपत्र बोर्ड (सेबोन) ले हकप्रद सेयर निष्कासन गर्न रिडी पावर कम्पनी र अरुण भ्याली हाइड्रोपावर डेभलपमेन्ट कम्पनीलाई अनुमति दिएको छ।

दुवै कम्पनीले हकप्रद निष्कासनका लागि पुस १९ मा बोर्डबाट अनुमति पाएको नेप्सेमार्फत जानकारी दिएका हुन्। रिडी पावरले हाल कायम चुक्ता पुँजीको ५० प्रतिशत अर्थात् १ः०.५ अनुपातमा हकप्रद सेयर निष्कासन गर्नेछ। कम्पनीको बिक्री प्रबन्धक मुक्तिनाथ क्यापिटल रहेको छ।

कम्पनीले ७७ लाख ४४ हजार ५०६ कित्ता हकप्रद सेयर निष्कासन गर्नेछ। हाल कम्पनीको चुक्ता पुँजी १ अर्ब ५४ करोड छ। ५० प्रतिशत हकप्रद सेयर निष्कासनपछि पुँजी २ अर्ब ३२ करोड बढी पुग्नेछ।

कम्पनीको लगानी तथा व्यवस्थापनबाट सहायक कम्पनी साझा पावर डेभलपमेन्ट स्वामित्वमा रहने तल्लो बलेफी जलविद्युत् आयोजना निर्माण गर्न स्वपुँजी व्यवस्थापन गर्न हकप्रद सेयर निष्कासन गर्न लागेको हो।

अरुण भ्याली हाइड्रोपावरले हाल कायम चुक्ता पुँजीको शतप्रतिशत अर्थात् १ः१ अनुपातमा हकप्रद सेयर निष्कासन गर्न सेबोनबाट अनुमति पाएको हो।

अब कम्पनीले १ करोड ८६ लाख कित्ता हकप्रद सेयर निष्कासन गर्नेछ। बिक्री प्रबन्धक मुक्तिनाथ क्यापिटल रहेको छ। शतप्रतिशत हकप्रद सेयर निष्कासनपछि कम्पनीको चुक्ता पुँजी ३ अर्ब ७३ करोड पुग्नेछ। हकप्रद सेयर बिक्रीबाट प्राप्त रकममध्ये ९३ करोड ३९ लाख ८१ हजार ३०० रुपैयाँ पिके हाइड्रोपावर प्रालिले विकास गर्दै गरेको ३० मेगावाटको लिखु खोला जलविद्युत् आयोजना निर्माण गर्न आवश्यक स्वपुँजीका लागि पिके हाइड्रोपावरको संस्थापक सेयरमा लगानी गर्ने निर्णय गरेको कम्पनीले बताएको छ।

बाँकी रकम ९३ करोड ३९ लाख ८१ हजार ३०० रुपैयाँ कम्पनीले निर्माण सम्पन्न गरी सञ्चालनमा रहेको काबेली बी–१ क्यासकेड जलविद्युत् आयोजनाको निर्माण चरणमा बैंकबाट लिएको ऋण भुक्तानी गर्ने बताएको छ।

प्रकाशित मिति: आइतबार, पुस २२, २०८० ११:०५

प्रतिक्रिया दिनुहोस्