काठमाडौं। सुक्खा बन्दरगाह सञ्चालन गर्दै आएको नेपाल इन्टरमोडेल यातायात विकास समिति खारेजीको प्रक्रिया अघि बढेको छ। उद्योग वाणिज्य तथा आपूर्ति मन्त्रालयले विकास समिति खारेजीको प्रस्ताव मन्त्रिपरिषदमा पेश गरेको छ।
मन्त्रिपरिषदबाट खारेज भएपछि इन्टरमोडेलको अस्तित्व समाप्त हुनेछ। इन्टरमोडेल खारेजपछि सुक्खा बन्दरगाह सञ्चालनको जिम्मेबारी नेपाल पावरवहन तथा गोदाम व्यवस्थापन कम्पनी लिमिटेडले गर्ने भएको छ।
चालू आर्थिक वर्षको बजेटमा सरकारले नेपाल इन्टरमोडेललगायत अन्य २० वटा सार्वजनिक संस्था खारेज गर्ने निर्णय गरेको थियो। राजस्वले चालू खर्च नधान्ने अवस्था आएपछि सरकारले मितव्ययिता अपनाउन कम प्रभावकारी भएका सार्वजनिक संस्थाहरु खारेज गर्न लागेको हो।
सरकारले सार्वजनिक खर्च पुनरावलोकन आयोग २०७५ ले दिएका सुझावहरूलाई क्रमशः कार्यान्वयन गर्ने क्रममा २० वटा संस्थाहरुलाई खारेजी गर्ने भएको हो।
सरकारको स्थायी संरचनासँग दोहोरो कार्यक्षेत्र परेका, औचित्य समाप्त भएका र परिवर्तित सन्दर्भमा आवश्यक नरहेका २० वटा संस्थाहरू खारेज गरिने बजेटमा उल्लेख छ। यसैगरी उस्तै प्रकृतिका कार्यक्षेत्र रहेका निकायहरूलाई एक अर्कामा गाभिने बजेटमा उल्लेख छ।
क्षेत्राधिकारका आधारमा प्रदेश तथा स्थानीय तहबाट सञ्चालन र व्यवस्थापन हुन उपयुक्त हुने विभिन्न पर्यटन प्रवद्र्धन विकास समितिहरू तहमा हस्तान्तरण गरिने बजेटमा उल्लेख छ।
यसरी खारेज भएका निकायहरूको सम्पत्ति तथा दायित्व व्यवस्थापनको कार्य सम्बन्धित मन्त्रालयले मंसिर मसान्तभित्र सम्पन्न गर्नुपर्ने व्यवस्था बजेटमा गरिएको छ।
सरकारले इन्टरमोडेललगायत कपास विकास समिति, राष्ट्रिय दुग्ध विकास बोर्ड, केन्द्रीय धनादेश कार्यालय, अतिरित्त हुलाक कार्याल, महिला तथा बालबालिका विभाग, विभिन्न मेडिकल कलेज पूर्वाधार विकास समिति, जिल्ला निर्वाचन कार्यालय, तथ्यांक कार्यालय, रेल्वे बोर्ड, भुमिगत जलस्रोत विकास समिति, राष्ट्रिय सूचना प्रविधि केन्द्र खारेज गर्ने बजेटमा उल्लेख गरेको छ।
यस्तै, सरकार स्वामित्वको नेपाल टेलिभिजन र रेडियो नेपाललाई एक आपसमा गाभ्ने (मर्ज) गर्ने बजेटमा उल्लेख गरिएको छ।
