काठमाडौं। ग्लोबल आइएमई बैंकले स्थापनाको १७औं वार्षिकोत्सव अवसरमा शनिबार देशव्यापी प्रभातफेरी कार्यक्रम आयोजना गरेको छ।
जनमानसमा वित्तीय साक्षरता तथा बैंकिङ सचेतना बढाउने उद्देश्यले संस्थागत सामाजिक उत्तरदायित्वअन्तर्गत बैंकले सात वटै प्रदेशका मुख्य–मुख्य सहरमा प्रभातफेरी कार्यक्रम गरेको हो। ग्लोबल आइएमई बैंक पुस १७ देखि स्थापनाको १६ वर्ष पूरा भई १७औं वर्ष प्रवेश गर्दै छ।
शनिबार काठमाडौमा आयोजित प्रभातफेरीमा बैंक अध्यक्ष एवं नेपाल उद्योग वाणिज्य महासंघ अध्यक्ष चन्द्रप्रसाद ढकाल, बैंक सञ्चालक समिति सदस्यहरु, बैंक उच्च व्यवस्थापनसहित १५ सय बढी कर्मचारी उपस्थित थिए।
वित्तीय साक्षरता, बैंकिङ शिक्षामूलक प्लेकार्ड लेखिएका ब्यानरसहित प्रभातफेरीमा सहभागी कर्मचारीले कान्तिपथस्थित शाखा हुँदै सहरका मुख्य–मुख्य भागको परिक्रमा गरेका थिए भने उपत्यका बाहिरका मुख्य–मुख्य सहरमा पनि प्रभातफेरी कार्यक्रम आयोजना गरिए।
ग्लोबल आइएमई मुलुकका ७७ वटै जिल्लामा शाखा सञ्जाल रहेको निजी क्षेत्रको पहिलो तथा वित्तीय परिसूचकअनुसार मुलुककै सबैभन्दा ठूलो बैंक वाणिज्य बैंक हो।
बैंकले ३५५ शाखा, ३७९ एटिएम, २७४ शाखारहित बैंकिङ सेवा, ६५ एक्सटेन्सन र राजस्व संकलन काउन्टर तथा ३ अन्तर्राष्ट्रिय सम्पर्क÷वैदेशिक प्रतिनिधि कार्यालयसहित १,१०० बढी सेवा केन्द्रबाट बैंकिङ सेवा दिँदै आएको छ।
बैंकमा करिब ४ हजार कर्मचारी कार्यरत छन्। करिब ४५ लाख बढी ग्राहकलाई प्रत्यक्ष सेवा दिइँदै आएको बैंकले जनाएको छ।
-1732445197.jpg)
