प्राधिकरणद्वारा अदालतसमक्ष टिओडी मिटरको कुनै पनि रेकर्ड नरहेको स्वीकार (पत्रसहित)

पूर्वाधार

गृहपृष्ठ
पूर्वाधार

प्राधिकरणद्वारा अदालतसमक्ष टिओडी मिटरको कुनै पनि रेकर्ड नरहेको स्वीकार (पत्रसहित)

क्यापिटल नेपालबुधबार, पुस ११, २०८०

काठमाडौं। नेपाल विद्युत् प्राधिकरणसँग टाइम अफ डे (टिओडी) मिटरको कुनै पनि रेकर्ड नरहेको पुष्टि भएको छ।

प्राधिकरणले २०८० असोज ११ मा सुनसरी जिल्ला अदालतलाई दिएको पत्रमा टिओडी मिटरको नयाँ डाटाले पुरानो डाटालाई प्रतिस्थापन गर्ने भएकाले उक्त अवधिको डाउनलोड डाटा उपलब्ध गराउन नसकिने बेहोरासहित पत्र बुझाएको फेला परेको हो।

प्राधिकरणसँग अदालतले २०८० भदौ १३ मा रिलाइन्स स्पिनिङ मिल्सका सन्दर्भलाई लिएर पत्र काटेको थियो। सोही पत्रको जवाफ दिने क्रममा आफूसँग टिओडी मिटरको कुनै पनि रेकर्ड नरहेको भनेको हो।

प्राधिकरणले २०८० असोज ११ मा सुनसरी जिल्ला अदालत र मकवानपुर जिल्ला अदालतलाई दिएको जवाफमा एकै किसिमको शब्द उल्लेख छ।

त्यसैगरी प्राधिकरणले मकवानपुर जिल्ला अदालतलाई दिएको जवाफ पनि समान छ। शिवम् सिमेन्टको टिओडी मिटरको डाटा डाउनलोड रिपोर्ट सम्बन्धित वितरण केन्द्रमा लामो समयसम्म रेकर्ड कायम नहुने हुँदा उल्लिखित अवधिको रेकर्ड फेला पार्न नसकेको पत्र पठाएको हो।

यी दुई पत्रबाट प्राधिकरणले प्रमाण बेगर उद्योगीमाथि ज्यादती गर्न खोजेको प्रमाणित हुन्छ। प्राधिकरणले आफूसँग टिओडी मिटरको रेकर्ड रहेको सार्वजनिक अभिव्यक्ति दिए पनि अदालतलाई जवाफ दिने क्रममा आफूसँग कुनै रेकर्ड नरहेको भनेको हो।

विद्युत् वितरण नियमावली, २०६९ अनुसार टिओडी मिटर जडान भएका ग्राहकको प्राविधिक कारणले गर्दा मिटरले वास्तविक खपत नदेखाई बिलिङ छुट भए त्यस्तो छुट खपत युनिट र डिमान्ड चार्जबापत मिटरको डाउनलोड डाटा विश्लेषण गर्दा यकिन भएअनुसारको रकम छुट बिल गरिनेछ। तर, प्राधिकरणसँग डाउनलोड डाटै छैन।

प्रकाशित मिति: बुधबार, पुस ११, २०८० १२:३९

प्रतिक्रिया दिनुहोस्