काठमाडौं। जाजरकोट भूकम्पका ६७ हजार बढी लाभग्राहीमध्ये आजसम्म ११ हजार तीन सय ३६ घर (अस्थायी आवास) निर्माण सम्पन्न भएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अन्य १० हजार १ सय १८ घर निर्माणाधीन छन्। अहिले धमाधम अस्थायी आवासका लागि अनुदानबापतको रकम सम्झौता गरी बुझ्ने र घर निर्माण जारी रहेको प्राधिकरणका प्रमुख कार्यकारी अधिकृत अनिल पोखरेलले जानकारी दिए।
उनका अनुसार जाजरकोटमा पाँच हजार दुई सय दुई, रुकुम पश्चिममा पाँच हजार सात सय ९८, सल्यानमा एक सय ९३, बझाङमा १३ र बाजुरामा एक सय ३० घर निर्माण सम्पन्न भइसकेका छन्।
पोखरेलले आजसम्म केन्द्रबाट अस्थायी आवासका लागि दुई अर्ब २६ करोड रकम जिल्ला विपद् व्यवस्थापन समितिमा पठाइसकिएको जानकारी दिए।
त्यसमध्ये १ अर्ब ५३ करोड जिल्लाबाट स्थानीय तहमा पुगिसकेको छ। स्थानीय तहबाट प्रक्रिया पुगेका लाभग्राहीको खातामा भने ५८ करोड ७८ लाख रकम पठाइसकिएको उनले बताए।
अहिलेसम्म जाजरकोटमा ३५ हजार एक सय ४०, रुकुमपश्चिममा २३ हजार ६ सय आठ, सल्यानमा १ हजार सात सय ३०, बझाङमा चार हजार पाँच सय ७६ र बाजुरामा दुई हजार सात सय २९ गरी कुल ६७ हजार सात सय ८३ लाभग्राही कायम भएका छन्।
अझै झन्डै ५० हजार लाभग्राहीसँग अनुदान सम्झौता हुन बाँकी रहेकाले त्यो काम जारी रहेको प्राधिकरणका नीति तथा योजना महाशाखा प्रमुख भरतमणि पाण्डेले बताए।
उनका अनुसार सुरुमा अस्थायी आवासका लागि सेवा लिने लाभग्राहीको संख्या गति कम भए पनि अहिले भने बढिरहेको छ।
लाभग्राहीको पहिचान हुँदै गएकाले संख्या थपिने क्रम बढेको भन्दै लाभग्राहीको संख्या ८० हजार पुग्ने अनुमान गरी सोहीअनुसार तयारी भइरहेको पाण्डेले जानकारी दिए।
उनका अनुसार ८० हजार लाभग्राही हुँदा उनीहरूको अस्थायी आवासका लागि ४ अर्ब ७५ करोड लाग्ने भएकाले सोहीअनुसार बजेट व्यवस्थापनको तयारीमा प्राधिकरण लागेको छ। त्यसमध्ये २ अर्ब २६ करोड रकम पठाइसकिए पनि बाँकी रकमको जोहो गर्नुपर्ने उनको भनाइ थियो।
जाजरकोटको रामीडाँडा केन्द्रबिन्दु भएर गत कात्तिक १७ मा ६.४ म्याग्निच्युडको भूकम्प गएको थियो। उक्त भूकम्पले जाजरकोटसहित रुकुम पश्चिम, सल्यान, बझाङ, बाजुरामा क्षति भौतिक तथा मानवीय क्षति पुगेको थियो।
तरुण दलले जाजरकोटमा बनायो ६० अस्थायी आवास
सत्तारुढ कांग्रेस निकट नेपाल तरुण दलले पुनर्निर्माण अभियानअन्तर्गत अभियानको आठौं दिनसम्म जाजरकोटको विभिन्न स्थानमा साट्ठी (६०) ओटा अस्थायी आवास निर्माण गरिसकेको जनाएको छ।
जाजरकोटको रिम्ना, पिपे, रावत गाउँ गरी भूकम्पपीडितका लागि तरुणले बनाउँदै गरेको जस्तापातासहित अस्थायी तीनै ठाउँको टहराको तरुण दल केन्द्रीय समितिको टोलीको संयोजन अध्यक्ष विद्वान गुरुङले गरिरहेका छन्।
पुनर्निर्माणको सुरु दिनदेखि नै जाजरकोटमा परिचालित तरुण दलका केन्द्रीय सदस्य पवन यादवका अनुसार मंगलबार टोली खलंगा जाने तयारी छ ।त्यहाँ ३० वटासम्म अस्थायी आवास निर्माण गरिने केन्द्रीय सदस्य दिनेश राईले बताए।
अध्यक्ष विद्वान गुरुङले त्यहाँका स्थानीयसँग मंसिर १७ को भूकम्पले क्षति गरेको अवस्थाबारे सोधपुछ गरेको तरुण दलले जनाएको छ। केन्द्रीय सदस्य यादवले भूकम्पपीडितको अस्थायी आवास निर्माण अन्तिम चरणमा पुगेको बताए।
-1732511127.png)
