काठमाडौं। सार्वजनिक तथा निजी लगानी रहेको १ सय २ मेगावाटको मध्यभोटेकोसी जलविद्युत आयोजना सम्पन्न भएको छ। आयोजना सम्पन्न भए पनि प्रसारण लाइन र सबस्टेसनको काम निर्धारित समयमा सम्पन्न नहुँदा उत्पादिन विद्युत् उत्पादन फेरि पछाडि धकेलिएको छ।
नेपाल विद्युत् प्राधिकरणले बाह्रबिसेमा सबस्टेसन समयभित्र बनाउने अनुमानका आधारमा बिजुली उत्पादनको नयाँ कार्यतालिका तयार पारिएको थियो।
यसअघि आयोजनाको समय लम्बिएर मंसिर मसान्त पुर्याइएको थियो। आयोजनाको सबै काम सकिएको मध्य भोटेकोसी जलविद्युत् कम्पनी लिमिटेडका प्रमुख कार्यकारी अधिकृत (सिइओ) रामगोपाल सिवाकोटीले बताए।
आयोजनाबाट उत्पादन हुने बिजुली २ सय २० केभी बाह्रबिसेस्थित सबस्टेसनमा जोड्ने तय भए पनि त्यसमा भएको ढिलाइले अहिले आयोजनाले बैकल्पिक उपाय गरेर लामोसाँघुस्थित १ सय ३२ केभी सबस्टेसनमा जोड्ने तयारी भएको उनले सुनाए।
आउँदो माघसम्म प्रसारण लाइनमा जोड्न लागेको उनले जानकारी दिए। राजधानीको लप्सीफेदीमा प्रसारण लाइन बनाउन अवरोध आएपछि समस्या उब्जिएको उनले बताए।
आयोजनाबाट उत्पादन हुने बिजुली राजधानीको लप्सीफेदीस्थित प्रसारण लाइनमा जोड्ने योजना छ।
यसअघि आयोजनाबाट असोजदेखि बिजुली उत्पादनको नयाँ कार्यतालिका बनेको थियो। त्यसअघि साउन १५ बाट बिजुली उत्पादन गर्ने लक्ष्य थियो। आयोजनाको काम नसकिँदा उत्पादन पछि धकेलिँदै गएको छ।
२०७९ पुसभित्र सक्ने लक्ष्य राखिएकोमा म्याद थपेर असारमा पुर्याइएको थियो। आयोजना निर्माणमा ढिलाइ हुँदा लागत अनुमानभन्दा २ अर्ब ७४ करोड ९६ लाख रुपैयाँ बढेको छ।
कर्मचारी सञ्चय कोषसँग ऋण सम्झौता हुँदा निर्माण अवधिको ब्याजबाहेक आयोजनाको लागत १२ अर्ब २८ करोड ३३ लाख रुपैयाँ थियो। आयोजनाको अद्यावधिक अनुमानित लागत निर्माण अवधिको ब्याजबाहेक १५ अर्ब ३ करोड २ लाख ९० रुपैयाँ पुगेको छ।
निर्माणाधीन आयोजनाको सुरुको कुल लागतमध्ये ५० प्रतिशत स्वपुँजी र ५० प्रतिशत ऋणबाट जुटाइएको छ। मध्य भोटेकोसी आयोजनाले बिजुली बेचेर वार्षिक २ अर्ब ८० करोड रुपैयाँ आम्दानी गर्ने भएको छ। आयोजनाले ५४ करोड २२ लाख युनिट बिजुली विद्युत् प्राधिकरणलाई बेचेर उक्त रकम आम्दानी गर्ने भएको हो।
नदी प्रवाही (आरओआर) आयोजनाबाट सुक्खायाममा ८ करोड ३७ लाख र बर्खामा ४५ करोड ४५ लाख युनिट बिजुली उत्पादन हुने कम्पनीको भनाइ छ।
२०७१ साउनको जुरे पहिरो, ०७२ वैशाखको विनाशकारी भूकम्प, २०७२ असोजदेखि करिब साढे पाँच महिना लामो भारतीय नाकाबन्दी, २०७३ असारमा भोटेकोसी नदीमा आएको बाढी, गत वर्ष असारमा निर्माण स्थल भोटेकोसी नदी एवं आसपास क्षेत्रमा आएको बाढीपहिरो तथा कोभिड–१९ महामारीको चपेटामा आयोजना परेको थियो।
प्राकृतिक विपत्ति र सिभिल एन्ड हाइड्रोमेकानिकल कार्यको ठेकेदार चिनियाँ कम्पनी क्वाङ्सी हाइड्रो एन्ड इलेक्ट्रिकल कन्स्ट्रक्सनको कमजोर कार्य सम्पादनका कारण आयोजना निर्माण सम्पन्न हुने तालिका प्रभावित भएको थियो।
आयोजनाको लागत बढ्न नदिन सिभिल तथा हाइड्रोमेकानिकल कार्य इन्जिनियरिङ, प्रोक्योरमेन्ट एन्ड कन्स्ट्रक्सन (इपिसी) मोडलमा चिनियाँ कम्पनी क्वाङ्सीले ठेक्का लिएको थियो। इलेक्ट्रो मेकानिकलतर्फको काम भने एन्ड्रिज हाइड्रोले सम्पन्न गरेको छ।
आयोजनाको हेड २ सय ३५ मिटर अग्लो छ। सुरुङको लम्बाइ सात किलोमिटर छ। मध्य भोटेकोसी कम्पनीको चुक्ता पुँजी ६ अर्ब रुपैयाँ छ। यसमा ५१ प्रतिशत संस्थापक सेयरधनी र ४९ प्रतिशत सर्वसाधारणको हिस्सा छ।
संस्थापक सेयरधनीमा विद्युत् प्राधिकरणको १०, चिलिमे जलविद्युत कम्पनी ३७, सिन्धुपाल्चोक हाइड्रोपावर कम्पनी १, नेपाल अरनिको हाइड्रोपावर कम्पनी १, सिन्धु इन्भेस्टमेन्ट कम्पनी १ र सिन्धु भोटेकोसी हाइड्रोपावरको १ प्रतिशत छ।
४९ प्रतिशत सर्वसाधारण सेयरधनी समूहतर्फ सञ्चय कोषका सञ्चयकर्ता कर्मचारीको १९.५, संस्थापक संगठित संस्थाका कर्मचारीको ३.५, ऋणदाता संस्थाका कर्मचारीको १, सिन्धुपाल्चोकका स्थानीयको १० र सर्वसाधारणको १५ प्रतिशत हिस्सा छ।
-1732445197.jpg)
