काठमाडौं। उद्यमी तथा साहित्यकार वसन्त चौधरीले अन्तर्वार्तामा आधारित श्रव्यदृश्य कार्यक्रम ‘मनका कुरा विथ वसन्त चौधरी’ सञ्चालनको उद्घोष गरेका छन्। सिजी इन्टरटेनमेन्ट युट्युब च्यानलमा हरेक शुक्रबार राती ८ बजे उक्त कार्यक्रम प्रसारण हुनेछ।
‘जीवन एउटा यात्रा हो। जीवन यात्राका क्रममा धेरै ट्वीस्ट हुन्छन्। तथापि आफूले चाहेको गन्तव्यमा पुग्न अनवरत प्रयत्न गरिरहनुपर्छ। यही अनवरत प्रयत्नले गर्दा नै व्यापार व्यवसायबाहेक मेरो मनले रोजेको सिर्जना यात्रामा केही पाइला हिँड्न सकें,’ कार्यक्रम उद्घोष गर्दै उनले भनेका छन्।
उनले आफ्ना कुराबाहेक जीवन र जगत्बाट सिकेका र अनुभूत गरेका कुराहरू आफ्ना सिर्जनामा उतारेको बताएका छन्। उनले भनेका छन्, ‘मलाई तपाईंका मनका कुरा सुन्न मन लाग्यो। तपाईंका मनका कुरा अरूलाई पनि सुनाउन मन लाग्यो।’
चौधरीले यस कार्यक्रममा विभिन्न व्यक्तित्वलाई ल्याएर उनीहरूको संघर्ष तथा जीवनयात्राका आरोह–अवरोह पस्कनेछन्। जसका लागि उनले मनीषा कोइराला, सुरक्षा पन्त, दीपक वज्राचार्य, उद्यमी विदुषी राणा, वरिष्ठ कलाकार निर शाह, मान्सी अग्रवाल, गायिका आनी डोल्मा, रुवि राणालगायतको अन्तर्वार्ता हरेक शुक्रबार प्रसारण गरिनेछ।
२२ डिसेम्बरमा कार्यक्रममा पहिलो अतिथिका रूपमा मनीषा कोइराला रहनेछन्। त्यसपछिका हरेक शुक्रबार अन्यलाई अतिथि बनाइनेछ।
