दाङ।दाङमा वार्षिक ६०९ टन माछा उत्पादन हुने गरेको छ। उत्पादन बढेसँगै केही वर्ष अघिसम्म बाह्य जिल्लाको भर पर्नुपर्ने अवस्था अन्त्य भएको छ।
अहिले आन्तरिक उत्पादनले बजार मागलाई धान्न थालेको छ। माछाका लागि अन्य जिल्लाको भर पर्नुपर्ने अवस्था नभएको भेटेरिनरी अस्पताल तथा पशुु सेवा विज्ञ केन्द्र दाङका मत्स्य विकास अधिकृत प्रेम चौधरीले बताए।
पछिल्लो समय माछामा आत्मनिर्भर हुँदै गएको उनको भनाइ छ। जिल्लामा ५ देखि ७ प्रतिशत मात्रै माछा बाहिरबाट आउने गरेको उनले बताए।
जिल्लामा अहिले करिब एक सय ९५ हेक्टर क्षेत्रफलमा माछापालन हुने गरेको छ। यसमा व्यावसायिक रूपमा एक सय १५ हेक्टरमा माछापालन गर्ने गरिन्छ। अरु प्राकृतिक तथा कृत्तिम जलाशयमा माछापालन हुने गरेको छ। जिल्लामा करिब २८५ जना माछापालन किसान रहेका छन्।
विगतमा कार्प प्रजातिका माछा मात्रै पालन हुने गरेको जिल्लामा अहिले पंगास प्रजातिका माछापालन हुन थालेसँगै उत्पादन बढेको हो। विगतमा कार्प प्रजातिका कमन, सिल्भर, रोहु, नैनीलगायतका माछापालन हुन्थ्यो।
अहिले पंगास प्रजातिका वैखालगायत माछापालन हुन थालेसँगै माछाको उत्पादन पनि बढेको कार्यालयले जनाएको छ। जिल्लामा वार्षिक उत्पादन हुने माछाको बजार भने बाह्रै महिना धान्ने अवस्थामा अझै पुग्न सकेको छैन।
खासगरी, चैत, वैशाख, जेठमा बाहिरबाट माछा आउने गर्छ। बाँकी समय भने यहीँको उत्पादनले बजारको माग धान्ने गरेको छ। व्यावसायिक रूपमा माछापालन गर्ने किसानको आकर्षण बढ्दै गएको र राज्यले माछापालनका लागि किसानलाई पनि सहुलियत प्रदान गर्ने नीति बनाएकाले यसतर्फ किसानको रुचि बढ्दै गएको उनको भनाइ छ।
राज्यले किसानलाई माछापालनका लागि प्रोत्साहन गर्न पनि विभिन्न कार्यक्रम सञ्चालन गरेको छ। यसले पनि किसानको आकर्षण बढेको हो।
यद्यपि, माछा खाने उपभोक्ताको अवस्थामा सुधार आउन सकिरहेको छैन। स्वास्थ्यका दृष्टिकोणले माछा लाभदायक भए पनि काँडाको डरले माछा खानेको संख्या अपेक्षागत बढ्न सकेको छैन। माछा उत्पादनको सिजनमा माछाको खपत हुन नसक्दा जिल्ला बाहिर पनि निर्यात हुने गरेको चौधरीले बताए।
अहिले पनि जिल्लामा माछाको खपत हुन नसकेको अवस्थामा रुकुम, रोल्पा, सुर्खेतसम्म किसानले माछा बिक्रीका लागि पठाउने गरेका छन्। माछाको बजार राम्रो रहेकाले किसानले माछामा घाटा व्यहोर्नुपर्ने अवस्था नरहेको भेटेरिनरी अस्पताल तथा पशुुसेवा विज्ञ केन्द्र दाङले जनाएको छ।
आछामा आत्मनिर्भर बन्दै गए पनि माछाको भुराका लागि भने परनिर्भर हुने अवस्था कायमै छ। जिल्लामा माछा भुरा उत्पादन भए पनि आत्मनिर्भर हुन सकेको छैन।–रासस
