भैरहवा (रुपन्देही)। रुपन्देही सिद्धार्थनगर नगरपालिकामा विकास–निर्माणका निम्ति सहयोग गर्दै आएको बहुपक्षीय निकाय एसियाली विकास बैंक (एडिबी) ले नयाँ विकास परियोजना सुरु गर्ने भएको छ।
सिद्धार्थनगरनगर नगरपालिकाले नगर विकासका लागि प्रस्ताव गरेको योजनामा एडिबीले सघाउने जानकारी दिएको छ।
‘हामीले प्रस्ताव गरेका आयोजनामा एडिबीले सहयोग गर्ने जानकारी ‘प्राप्त भएको छ,’ सिद्धार्थनगर नगरपालिकाका प्रमुख इश्तियाक अहमद खाँले भने, ‘अब थप प्रक्रिया अगाडि बढाउँछौं, परियोजनाले नगरको मुहार फेर्न मद्दत पुग्ने छ।’
उनले आफूहरू नगर विकासका निम्ति लागिपरेको र अन्य परियोजना पनि नगर क्षेत्रमा समावेश गराउन डटेर लागेको बताए।
एडिबीको ऋण सहयोगमा नगरपालिका क्षेत्रका सडकमा पैदलयात्री मार्ग, पानीको निकासका निम्ति नाला, साइकल चलाउन बेग्लै बाटो, डण्डा नदीलाई करिडोरका रूपमा विकास गरिने छ। परियोजनाअन्गर्तत साढे २६ किलोमिटर सडक कालोपत्र गरिने छ।
मंसिर २८ गते एडिबीले नेपालको दिगो पर्यटन प्रवर्द्धन गर्दै स्थानीयबासिन्दालाई गुणस्तरीय जीवनयापनमा सघाउने उद्देश्यले जीवनयापान सुधार परियोजना कार्यान्वयन गर्न १६ अर्ब ६० करोडको वित्तीय सहायता उपलब्ध गराउने घोषणा गरेको थियो।
पर्यटनका माध्यमबाट स्थानीय अर्थतन्त्र सबल बनाउन देवदह, लुम्बिनी सांस्कृति, सैनामैना, सिद्धार्थनगर र तिलोत्तमा नगरपालिकाका साथै जनकपुर उपमहानगरपालिका र पोखरा महानगरपालिकाको आर्थिक वृद्धिमा सघाउन उक्त सहायता घोषणा भएको थियो।
-1732445197.jpg)
