म्याग्दी। अन्नपूर्ण गाउँपालिका-७ दोसल्लेमा सुुन्तला बगैंचाभित्र रहेको विद्युत् वितरण लाइनको नाङ्गो तार हटाउन थालिएको छ। सुुन्तलाको बगैंचाभित्र रहेको विद्युुत्को नाङ्गो तारका कारण दुर्घटना जोखिम बढेको थियो।
नाङ्गो तारका कारण किसान बगैंचा पस्न डराउने गरेका थिए। नेपाल विद्युत् प्राधिकरणको बेनी वितरण केन्द्रले सुुन्तला बगैंचाभित्र रहेको नाङ्गो तार हटाउन थालेको दोसल्लेका बासिन्दा अन्नपूूर्ण गाउँपालिकाका पूर्वउपाध्यक्ष केशमाया मगरले जानकारी दिए।
उनका अनुुसार नाङ्गो तार हटाएर राखिने एबिसी केबुुल तारसहित मजदुुर र प्राविधिकको टोली बुुधबार दोसल्ले पुुगेको छ।
‘सुुन्तलाको हाँगाले नाङ्गो तार छोएकाले बगैंचाभित्र पस्न जोखिम थियो,’ उनले भने। प्राधिकरण बेनी वितरण केन्द्रमार्फत तत्कालै तार हटाउने काम सुुरु भएको हो। केन्द्र प्रमुुख प्रताप बरालले दोसल्लेमा एक किलोमिटरभन्दा बढी वितरण लाइनको नाङ्गो तार हटाएर एबिसी केबुल राख्न थालिएको बताए।
४२ परिवार बस्दै आएको दोसल्लेमा पूरै गाउँमा सुन्तलाखेती गरिएको छ। ९ हजार सुन्तलाका बोट भएको बगैंचाको बीचमा रहेको ११ केभी क्षमताको वितरण लाइनको नाङ्गो तारले हाँगा छुन थालेको थियो।
‘सुन्तलाको बोटले बिजुलीको वितरण लाइनको तार छोएकाले बगैंचा जाँदा करेन्टको झट्का आउँछ,’ दोसल्ले व्यावसायिक सुन्तला कृषक समूह अध्यक्ष प्रेम पाइजाले भने, ‘तारमा छोइएर सुन्तलाका बोट मर्न थालेका छन्। रहेका बोटका सुन्तलाको दाना टिप्न, गोडमेल र मलजलका लागि बगैंचामा पस्न डर छ।’
सुन्तलाको बोट हुर्कंदै गएपछि हाँगाले नाङ्गो तार छोएर जोखिम बढेको हो। ४ सय भोल्टको विद्युत् प्रवाह हुने नाङ्गो तारले छोइएर सुन्तलाका बोट मर्न थालेका छन्। गोडमेल गर्दा र सुन्तलाको फल टिप्दा करेन्ट लाग्ने जोखिम रहेको स्थानीय बेगबहादुर पाइजाले बताए।
स्थानीयवासीले विद्युतीय दुर्घटना जोखिम न्यूनीकरणका लागि नाङ्गो तार हटाएर एबिसी केबुल भएको कालो तार जडान गर्ने व्यवस्था गर्न माग गर्दै आएका थिए।
अन्नपूर्णको दोवा, बेनी नगरपालिकाको बास्कुनालगायत ठाउँमा बस्ती र बगैंचामाथि रहेको विद्युत तार व्यवस्थापन गर्न आवश्यक रहेको स्थानीयले बताएका छन्।
