विराटनगर। कोशी प्रदेश सरकारको पर्यटन, वन तथा वातावरण मन्त्रालयमातहत निकायले चालू आर्थिक वर्ष २०८०/८१ को प्रथम त्रैमासिक अवधिको प्रगति समीक्षा कार्यक्रम गरेको छ।
प्रदेश वन निर्देशनालय, धरानद्वारा आयोजित कार्यक्रममा मन्त्रालयअन्तर्गतका वन निर्देशनालय, पर्यटन विकास आयोजना, जलाधार व्यवस्थापन कार्यालय धनकुटा र ओखलढुङ्गा, पर्यटन कार्यालय धरान र काँकडभिट्टा, वन अनुसन्धान तथा प्रशिक्षण केन्द्र, प्रदेशका १५ डिभिजन वन कार्यालय तथा संघीय सरकारअन्तर्गतका वन बीउ प्रयोगशाला तथा भण्डारण केन्द्र, चुरे उत्थानशील आयोजनाले आ-आफ्ना कार्यपत्र प्रस्तुत गरे।
पर्यटन, वन तथा वातावरणमन्त्री गणेशप्रसाद उप्रेतीले कर्मचारीलाई आफ्नो क्षमता तथा दक्षता वृद्धि गरी सिर्जनशीलका साथ आफ्नो जिम्मेवारी सम्पन्न गर्न, वित्तीय अनुशासन कायम गर्न, प्राकृतिक स्रोत संरक्षण गर्न र पर्यटन प्रवर्द्धनका कार्य योजना तयार गर्न निर्देशन दिए।
मन्त्रालयका सचिव विशाल घिमिरेले समग्र पर्यटन, वन, वातावरण, भूसंरक्षण, जैविक विविधता संरक्षण, मानव वन्यजन्तु द्वन्द्वबारे मन्तव्य दिँदै चालू आर्थिक वर्षका लागि स्वीकृत बजेट तथा कार्यक्रमलाई बेरुजु नहुने गरी पारदर्शिताका साथ सम्पन्न गर्न सबै मातहतका कार्यालयलाई निर्देशन दिए।
उनले कर्मचारीको न्यायोचित व्यवस्थापन गरी मौजुदा जनशक्तिबाट उच्चतम प्रतिफल आउने गरी काम गर्न आग्रह गरे।
-1732445197.jpg)
