काठमाडौं। चोभार सुक्खा बन्दरगाह सञ्चालनका लागि अन्तर्राष्ट्रिय प्रतिस्पर्धाबाट छनौट भएको ट्रान्स नेपाल फ्रेट सर्भिसेस जेभीले नेपाल इन्टरमोडल यातायात विकास समितिसँग सम्झौता गरेको छ।
ट्रान्स नेपालले टिआरएस लोजिपार्क प्रालि दर्ता गरी पाँच वर्षका लागि २ करोड ८८ लाख न्यूनतम पट्टा बहाल र नियमानुसार महसुल बाँडफाँट गर्ने गरी आज समितिसँग सम्झौता गरेको हो।
समितिको टर्मिनल पट्टा बहालमा दिनेसम्बन्धी नियमावली, २०७० बमोजिम समिति र उक्त कम्पनीबीच सोमबार भएको सम्झौताअनुसार कम्पनीले मंसिर २९ देखि चोभार सुक्खा बन्दरगाह सञ्चालन तथा व्यवस्थापन गर्ने छ।
समितिका कार्यकारी निर्देशक आशीष गजुरेलको उपस्थितिमा कम्पनीका निर्देशक युवक डंगोल र सञ्चालक कम्पनीका तर्फबाट प्रबन्ध निर्देशक मुकेशकुमार राठीले करार सम्झौतामा हस्ताक्षर गरेका छन्।
नेपाल इन्टरमोडल यातायात विकास समिति (गठन) आदेश, २०५४ बमोजिम समिति एक नियामक निकायका रूपमा रहेकाले समितिअन्तर्गत रहेका टर्मिनल (सुक्खा बन्दरगाह, एकीकृत जाँच चौकी र कन्टेनर फ्रेट स्टेसन) सञ्चालन तथा व्यवस्थापनका लागि समितिले गत साउन ८ मा अन्तर्राष्ट्रिय बोलपत्र आह्वान गरेको थियो।
कार्यक्रममा कार्यकारी निर्देशक गजुरेलले चोभार सुक्खा बन्दरगाह सञ्चालन सुरु भएको करिब २० महिनामा व्यापारिक प्रयोगमा वृद्धि भइरहेको र सुक्खा बन्दरगाह सञ्चालन र व्यवस्थापन जिम्मा निजी क्षेत्रलाई दिँदा सरकारलाई प्राप्त हुने राजस्व बढ्ने बताए।
गजुरेलले बन्दरगाहलाई पूर्णक्षमतामा सञ्चालनमा ल्याउन बल्खु–दक्षिणकाली सडकखण्डको कीर्तिपुरस्थित ल्याबोरेटोरी उच्च माध्यमिक विद्यालयको मुख्यद्वारदेखि चोभार सुक्खा बन्दरगाहसम्मको सडक चौडा गरी चार लेनको बनाउन र निजगढ–काठमाडौं द्रुतमार्ग निर्माण चाँडो सक्न अत्यावश्यक भएको बताए।
सञ्चालक कम्पनीका तर्फबाट प्रबन्ध निर्देशक राठीले सुक्खा बन्दरगाहको प्रभावकारी सञ्चालन तथा व्यवस्थापनमा नेपाल इन्टरमोडल यातायात विकास समितिलगायत अन्य सरकारी तथा सरोकारवाला निकायबाट विगतमा प्राप्त गरेको साथ र सहयोग आगामी दिनमा समेत प्राप्त हुने विश्वास व्यक्त गरे।
