काठमाडौं। ब्रिटिश काउन्सिलले एडिनबर्ग न्यापियर विश्वविद्यालयसँगको साझेदारीमा दक्षिण एशिया फेष्टिभल्स एन्ड कल्चर एकेडेमी (साफ्का) कार्यक्रममा सहभागिताका लागि आवेदन खुला गरेको छ।
अहिले विश्वभर स्वतन्त्र र स्थापित कला र संस्कृति मेलाहरुको वृद्धि अवस्थामा यो आवेदन खुलाइएको हो। यो पहलले मेला पर्वप्रति उत्साहित र उद्योगका विज्ञहरुबीचको दूरी मेटाउने सेतुको काम गर्ने आयोजकले जनाएको छ।
यसले भारत र दक्षिण एसियाका छिमेकी देशहरुमा अनलाइनमार्फत ज्ञान र अन्तरदृष्टि आदानप्रदानमा सहजीकरण गर्नेछ।
दक्षिण एशिया फेष्टिभल्स एकेडेमीको इन्टरमिडियट कोर्स सन् २०२४ को जनवरीमा शुरु हुनेछ। यसको आवेदन भने सन् २०२३ को नोभेम्बर १९ सम्म खुला रहनेछ।
साफ्कामा फेष्टिभल म्यानेजरहरुलाई फेष्टिभल व्यवस्थापनमा सफलताका लागि आवश्यक सीपयुक्त बनाउन विशेष गरी तयार पारिएका छोटा कोर्सहरु छन्।
यी कोर्सहरुले अन्तरर्राष्ट्रिय प्रोग्रामिङ र क्युरेशन, नेतृत्व र सुशासन, वित्तीय व्यवस्थापन, सञ्चालन र कर्मचारी व्यवस्थापन, मार्केटिङ र दर्शक विकास, जोखिम व्यवस्थापन र स्वास्थ्य एवम् सुरक्षा, समानता, विविधता र समावेशीकरणलाई समेट्नेछ।
फेष्टिभल व्यवस्थापनसम्बन्धी बलियो सीपको महत्वलाई अतिरञ्जित गर्न नसकिने ब्रिटिश काउन्सिल नेपालका निर्देशक शाहिदा म्याकडगले बताइन्।
‘बेलायतको विस्तृत र जीवन्त मेला÷पर्वका दृश्यहरु हेर्दा हामीलाई के थाहा छ भने यस्ता मेलापर्वहरुको राम्रो व्यवस्थापन र दक्ष मेलापर्व व्यवस्थापकले कलाको क्षेत्रमा दिगोपना र वृद्धिको थप सम्भाव्यताहरु ल्याउन सक्छन्,’ उनले भनिन् ‘कलाकार, अभिनेता र सृजनशीलता उद्यममा आवद्ध वा यसमा रुचि राख्ने व्यक्तिहरुलाई दक्षिण एशिया फेष्टिभल एकेडेमीले समावेशी परिस्थितिमा व्यावसायिक दृष्टिकोण विकसित गर्न असाधारण मौका उपलब्ध गराउनेछ भने अन्तरर्राष्ट्रिय मेला व्यवस्थापकहरुको विज्ञताबाट पनि उनीहरुले लाभ उठाउन सक्नेछन्।’
‘विश्वभर नै मेला एवम् पर्वहरु कलात्मक अभिव्यक्ति, सांस्कृतिक संवर्धन र समावेशिताका लागि मञ्चका रुपमा हेरिने उनले बताइन्।
‘यसले स्थानीय अर्थतन्त्रमा उल्लेख्य प्रभाव पार्न सक्छ। यसको सांस्कृतिक महत्व बेलायत र नेपाल दुवैतिर निकै धेरै छ, अनि यसले स्थानीय अर्थतन्त्रमा महत्वपूर्ण योगदान दिन सक्छ। एकेडेमीका लागि नेपालबाट आवेदन पाउने आशामा हामी छौं,’ उनले भनिन्।
साफ्काले उपलब्ध गराएको इन्टरमिडियट कोर्स तीन वर्षको अनुभवको परिणाम हो। यो एकेडेमिक बीएन कोर्स अनुसार बनेको हो। यसले दक्षिण एसियाको अद्वितीय मेलापर्व र सांस्कृतिक प्रसंगलाई अपनाएको छ।
यो प्रोग्राममा बेलायत र दक्षिण एसिया दुवैका फेष्टिभल एकेडेमिक्स र विज्ञहरुले सिकाउँछन्।
यो खासगरी पर्व निर्देशक, संस्थापक, उद्यमी र दक्षिण एशियाभर कला र संस्कृति मेलाका वरिष्ठ व्यवस्थापकका लागि तयार पारिएको हो।
यो १० हप्ता अवधिको गहन, संरचित सीप विकास कार्यक्रम हो। वरिष्ठ नेतृत्वदायक भूमिकामा सक्रिय अनुभव देखाउन सक्ने अनि मेला र संस्कृतिको क्षेत्रमा ५ देखि १० वर्षसम्म काम गरेको अनुभव भएकाबाट आउने निवेदनलाई विचार गरिने आयोजकले जनाएको छ।
प्रतिव्यक्ति खर्च ७ सय ५० पाउन्ड (१ लाख २१ हजार ५०० सय रुपैयाँ) लाग्नेछ। तर ब्रिटिश काउन्सिलले प्रतिव्यक्ति ५०० पाउन्ड सहुलियत दिनेछ। अर्थात् कुल खर्च २५० पाउन्ड (४० हजार ५०० रुपैयाँ) मात्रै हुनेछ।
