काठमाडौं। सडक विभागले वर्षाका कारण राष्ट्रिय राजमार्गमा बनेका खाल्डाखुल्डी पुर्ने र मर्मत गर्ने काम सुरु गरेको छ।
वर्षाका कारण धेरै सडकमा खाल्डाखुल्डी भएकामा तिनको मर्मत सुरु गरिएको विभागले जनाएको छ। मर्मत विभागको नियमित काम भएको र वर्षा सकिनासाथ अघि बढाइएको सम्भार महाशाखाका सिनियर डिभिजनल इञ्जिनियर (सिडिई) नातिबाबु खड्काले बताए। साउनबाट नियमित मर्मतका लागि असार महिनामै ठेक्का गरेर तयारी अवस्थामा बस्न निर्देशन दिइएको उनको भनाइ छ।
विभागले बर्सेनि वर्षा सकिनासाथ मर्मत गर्ने गरेको छ। वर्षा सकिनासाथ र अर्को वर्षा सुरु हुनु पहिले मर्मतको काम बढी हुन्छ। ‘वर्षा सकिनासाथ दसैं पनि पर्छ। तर, मौसमका हिसाबले पनि वर्षा सकिएपछि मर्मत गर्नु उपयुक्त हुन्छ,’ उनले भने।
यो वर्ष दसैं केही ढिला छ। मर्मतको काम बर्सेनि गर्ने समयमा गर्दा पनि दसैंमा सडक राम्रो अवस्थामा पुग्ने र मर्मतको काम सुरु भइसकेको उनले बताए। ‘सबैतिर काम भइरहेको रिपोर्ट आइरहेको छ, दसैंअघि सबैतिर भइसक्छ होला।’
राष्ट्रिय राजमार्गमा सडक बोर्डले बजेट व्यवस्थापन गर्ने र सडक विभागअन्तर्गत रहेका ३५ डिभिजनले नियमित मर्मत गर्छन्। सोहीअनुसार यो वर्ष पनि असार महिनामै ठेक्का भएको थियो। यो वर्ष बोर्डका लागि सरकारले रकम विनियोजन नगरेका कारण अहिले बजेटको समस्या रहेको सिडिई खड्काले बताए। ‘कतिपय काममा खर्च तुरुन्त हुने र भुक्तानी तुरुन्त दिनुपर्ने हुन्छ, उनले भने, ‘पुरानो दायित्व नै सबै भुक्तानी भइसकेको छैन।’
सडक विभागले मातहतका डिभिजन सडक कार्यालयलाई तुरुन्त काम गर्न निर्देशन दिएको र कार्ययोजना पनि बनेको थियो । काम सुरु भए पनि भनेजस्तो प्रगति भइनसकेको उनको भनाइ। ‘तुरुन्त भुक्तानी दिनसक्ने अवस्था नभएसम्म समस्या रहन्छ,’ उनले भने।
वर्षाको समयमा देशभरिका धेरै सडकमा क्षति भए पनि अहिले ती सबै चालू भइसकेको विभागले जनाएको छ। कतिपय सडकमा ठूलो क्षति रहेकामा तिनमा सडक खुलाइसकिएको र सडक मर्मतको काम गर्दै जाने विभागको योजना छ।
