काठमाडौं। नेपाली आकासमा सानो १८ सिटे जहाजबाट उडान सुरु गरेको बुध्द एयर बुधबारदेखि २६ वर्ष पूरा गरी २७ औं वर्षमा प्रवेश गरेको छ।
वातावरणमैत्री जहाजका साथै हवाई कम्पनीमा कार्यरत प्राविधिक, पाइलट तथा ग्राउन्ड अपरेसन टिमका आफ्ना जनशक्तिलाई राष्ट्रिय तथा अन्तर्राष्ट्रिय नियमनकारी निकायको आवश्यकताअनुसार निरन्तर क्षमता अभिवृद्धि गरिरहेको बुध्द एयरका कार्यकारी अध्यक्ष वीरेन्द्र बहादुर बस्नेतले बताए।
‘बुध्द एयरको उडान सेवालाई प्रभावकारी बनाउन राष्ट्रिय तथा अन्तर्राष्ट्रिय संस्थाबाट नियमित अडिट एवम मूल्याङ्कन गराउँदै आएका छौं,‘ अध्यक्ष बस्नेतले भने ‘यात्रुको समय हाम्रो उडान’ भन्ने मन्त्रका साथ विभिन्न गन्तव्यमा उडान सङ्ख्या अभिवृद्धि गरेको छ।’
पोखराका लागि दैनिक १७ विराटनगर तथा भैरहवाका लागि क्रमशः ९ र १० उडान भरिरहेको छ। यसबाहेकका गन्तव्यहरुमा पनि आधा दर्जनभन्दा बढी उडान रहेको छ। सुर्खेत, तुम्लिङटार तथा धनगढीमा पनि विस्तारै उडान सङ्ख्या थप्ने बताइएको छ।
२६ वर्षसम्म बुध्द एयरबाट २ करोडभन्दा बढी स्वदेशी तथा विदेशी यात्रुले सेवा प्राप्त गरिसकेका छन। बुध्द एयर निजीतर्फकै अगुवा एयरलाइन्स कम्पनी हो। हाल बुध्द एयरसँग ३ वटा एटीआर–४२ तथा १३ वटा एटीआर–७२ जहाज रहेका छन।
एटीआर जहाज यात्रुमैत्री हुनुका साथै वातावरणमैत्री जहाज हुन। बुध्द एयरले अक्टोबर महिनाभित्रै थप अर्को एटीआर जहाज ल्याउने तयारी गरेको छ। योसँगै बुध्द एयरको जहाज सङ्ख्या १७ पुग्नेछ।
जहाज मर्मतसम्भारका लागि बुध्द एयरसँग अत्याधुनिक ह्याङ्गर छ। जुन दक्षिणपूर्वी एसियाकै उत्कृष्टमध्ये एक हो। यो ह्याङ्गर विदेशबाट पनि पुरस्कृत भइसकेको छ। बुध्दले आफ्ना जहाज मात्रै मर्मतसम्भार नगरी स्वदेशी तथा विदेशी कम्पनीहरुलाई पनि सेवा दिइरहेको छ।
