मकवानपुर। अन्तर्राष्ट्रिय पर्यटन दिवसका अवसरमा ‘गोल्डेन ट्रयांगल बाइक टुर’ आयोजना गरिएको छ।
नेपाल टुरिजम फेस्टिभल दोस्रो संस्करणको तयारीस्वरूप एनटिपी मल्टिमिडिया ग्रुपले एक्सपल्स राइडर्स क्लबको सहकार्यमा पहिलोपटक बाइक टुर आयोजना गरेको हो।
नेपाल पर्यटन बोर्ड, नेपाल एसोसिएसन अफ टुर एन्ड ट्राभल एजेन्ट्स (नाटा), ट्रेकिङ एजेन्सिज एसोसिएसन अफ नेपाल (टान), नेपाल उद्योग वाणिज्य महासंघलगायत संघसंस्थासँगको समन्वयमा कलाकार, साहित्यकार, बाइकरसहित १ सय जनाको राइडर्स टीमले काठमाडौं–हेटौंडा–चितवन–लुम्बिनी–पाल्पा–पोखरा रुटमा बाइक टुर गर्ने नेपाल पर्यटन बोर्डका कार्यकारी अधिकृत धनञ्जय रेग्मीले जानकारी दिए।
उनले बाइक टुर नेपाललाई अन्तर्राष्ट्रियस्तरमा चिनाउने अवसर भएको बताए। पर्यटन समितिका सदस्य अच्युत गुरागाईंले बाइक टुर पर्यटन क्षेत्रको प्रचार गर्ने सशक्त माध्यम भएको बताए।
काठमाडौंबाट हिँडेको बाइक राइडर टोलीले आज मकवानपुरको पर्यटकीयस्थल मकवानपुर गढी दरबारको अवलोकन गरेको छ। त्यस अवसरमा मकवानपुर गढी गाउँपालिका–२ का वडाध्यक्ष बखानसिंह पाख्रिनले नेपालका महत्वपूर्ण पर्यटकीय गन्तव्यको प्रचारप्रसार तथा अन्तर्राष्ट्रियस्तरमा सकारात्मक सन्देश दिन बाइक टुरले सहयोग पुर्याउनेमा विश्वास व्यक्त गरे।
गतवर्ष मकवानपुरगढीमा साइकल यात्रीलाई स्वागत गरेको स्मरण गर्दै उनले पर्यटकीय गन्तव्यको प्रचारप्रसार गर्ने र पर्यटन प्रवर्द्धन गर्ने काममा गाउँपालिकामा सहयोग गर्ने बताए।
विभिन्न पर्यटकीय क्षेत्रको भ्रमण गर्ने योजनामा बनाइएको उक्त टुर पाचौँ दिनमा पोखरा पुग्नेछ। आगामी मङ्सिरमा पोखरामा हुने नेपाल टुरिजम फेस्टिभलको दोस्रो संस्करण तयारी तथा ब्रान्डिङका लागि लेकसाइडमा टुर समापन गरिने छ।
