दमौली। कृषि तथा पशुपंक्षी विकासमन्त्री डा. बेदुराम भुसालले सरकारले कृषि तथा पशुको स्वास्थ्यको विषयलाई प्राथमिकता दिएको बताएका छन्।
तनहुँ शुक्लागण्डकी–५ बेलचौतारामा नवनिर्मित शुक्लागण्डकी भेटेरेनरी अस्पतालको आज उद्घाटन गर्दै मन्त्री भुसालले पशु स्वास्थ्यको विषयलाई अहिलेको सरकारले महत्व दिएको बताए। पशुको मासु र पशुजन्य उत्पादन मानिसले प्रयोग हुने भएकाले पशु स्वस्थ राख्नुपर्नेमा मन्त्री भुसालको जोड थियो।
‘हामी जति मानवको स्वास्थ्यको बारेमा सचेत छौँ, त्यसको एक प्रतिशत पनि पशुको स्वास्थ्यको बारेमा प्राथमिकता दिएको पाउँदैनौँ। अहिलेको सरकार पशु स्वास्थ्यको क्षेत्रमा पनि काम गर्नुपर्छ भनेर लागि रहेको छ,’ मन्त्री भुसालले भने।
उनले नेपालमा कृषि र पशुपालन नै कृषिको मुख्य आम्दानी स्रोत भएको बताउँदै वर्तमान सरकारले यसैलाई प्राथमिकता दिएको उल्लेख गरे। उनले भने, ‘सरकारले किसानको हितमा काम गरेको छ। हामीले समयमै मल उपलब्ध गरायौँ। विद्यार्थीको हातमा समयमै पाठ्यपुस्तक पुर्यायौँ।’
नेपाल लाइभस्टक सेक्टर इनोभेसन आयोजनाको सहयोगमा मूल्य अभिवृद्धि कर बाहेक १ करोड २५ लाख १५ हजार रुपैयाँ लागतमा एक तले भवन निर्माण गरिएको हो।
देशभरि २८ वटा पालिकामा भवन निर्माण गरिएको आयोजनाका निर्देशक डा. रामनन्दन तिवारीले जानकारी दिए। आयोजनाले पशु स्वास्थ्य, नश्ल सुधार, खोप आपूर्ति लगायतका क्षेत्रमा कार्य गर्दै आएको छ।
तनहुँमा बन्दीपुर र शुक्लागण्डकीमा अस्पताल भवन निर्माण गरिएको छ। भवनबाट आधारभूत प्रयोगशाला सेवा, पशुचिकित्सक सेवा, सर्जरी तथा बन्ध्याकरणलगायतका सेवा प्रदान गरिने पशुसेवा शाखा शुक्लागण्डकीका प्रमुख मुक्तिराम पौडेलले जानकारी दिए।
