काठमाडौं। ‘माथि माथि सैलुङ्गेमा चौँरी डुलाउनेलाई......’ कुन्ती मोक्तानले गाएको यो सदाबहार गीत नसुन्ने सायदै कोही होलान्। गीतमा सुनिएको तर प्रचुर सम्भावना भएर पनि पर्यटकीय दृष्टिमा प्रचारप्रसार नभएको सैलुङमा स्पार्क कारले स्पार्क एड्भेन्चर २०२३ अन्तर्गत ’वाइल्ड स्टे विथ चौँरी’ आयोजना गरेको छ।
गत वर्ष लमजुङ भुजुङमा भीर मौरीको सिकार गरेर सुरु भएको स्पार्क एड्भेन्चरको दोस्रो संस्करण दोलखा र रामेछापको सिमानामा रहेको सैलुङ र त्यहाँको चौरीगोठलाई केन्द्रित गर्दै आयोजना गरिएको कार्यक्रम संयोजक अमरदीप भट्टराइले जानकारी दिए।
आगामी असोज ११ देखि १३ गतेसम्म हुने स्पार्क एड्भेन्चरमा सेलिब्रेटी, प्रशासनिक एवं सुरक्षा निकायका अधिकारी सहभागी हुने संयोजक भट्टराईले जानकारी दिए।
क्याप्टेन विजय लामा, वरिष्ठ अधिवक्ता डा. सुरेन्द्र भन्डारी, कलाकार निखिल उप्रेती, सन्दर्भदीप क्षेत्री, दिलीप रायमाझी, गायक यश कुमार, गरिमा शर्मा तथा लेखक बुद्धिसागर, ट्राभलर सिर्जना सिज्जुलगायतको उपस्थिति रहने भट्टराइले जानकारी दिए।
असोज ११ गते बिहान काठमाडौंदेखि सैलुङको यात्रा सुरु हुनेछ। असोज १२ गते चौरी गोठ र सैलुङलाई ‘एक्सप्लोर’ गर्ने आयोजकले जनाएको छ। सोही दिन साँझ स्थानीय सास्कृतिक कार्याक्रमसहित रैथाने खानामा रमाइने छ।
आन्तरिक पर्यटन खोजी गर्ने, चौँरीसँग जंगलमा रात बिताउने, स्थानीय संस्कृति, स्वादिष्ट खाना र नयाँ रमणीय ग्रामीण गन्तव्यहरू पत्ता लगाउने इच्छा भएकाले कार्याक्रममा सहभागी हुन पाउनेछन्।
हिमालयको ‘पानारोमा भ्यु’, लेकाली फूल र उच्च पहाडी इलाकाको अविश्वसनीय दृश्य अनुभव गर्न सहभागी हुनुपर्ने भट्टराई बताउँछन्। कार्यक्रममा सहभागी हुन दर्ता शुल्क ३० हजार रुपैयाँ रहेको छ।
वर्षौंदेखि ओझेलमा परेका वा विदेश भ्रमणका कारण पहिलो रोजाइमा नपरेका आन्तरिक गन्तव्य खोजी गर्न स्पार्क एड्भेन्चरलाई भविश्यमा पनि निरन्तरता दिइने संयोजक भट्टराईको भनाइ छ।
साहसिक पर्यटन क्षेत्रमा पनि काम गर्दै आइरहेको स्पार्क कारले पर्यटकहरूका लागि यातायात व्यवस्थापन गर्दै आइरहेको छ। सेल्फ ड्राइभमा कार उपलब्ध गराउने, ड्राइभरमात्र उपलब्ध गराउने देखि स्पार्कले देशैभरि ड्राइभरसहित सवारीसाधन पनि उपलब्ध गराउँदै आएको छ।
विवाइडी र स्पार्क कारको सहकार्यमा साउथ एसियामा सबैभन्दा बढी विद्युतीय गाडी परिचालन गर्ने संस्थाका रूपमा स्पार्क कार रहेको भट्टराईले बताए। स्पार्क कारले हरित वातावरण बनाउन सहयोग गर्ने, सन् २०३५ सम्ममा संस्थामा आवश्यक सबै सवारीसाधन विद्युतीयमात्रै प्रयोग गर्ने लक्ष्य राखेको छ।
