गोरखा। गोरखा नगरपालिका–१३ दरौँदी नदीमा अर्धजलाशययुक्त जलविद्युत आयोजना निर्माण हुने भएको छ। २ अर्ब १९ करोड ९५ लाख रुपैयाँ लागतमा उक्त आयोजना निर्माण हुन लागेको हो।
मनकामना दरौँदी हाइड्रोपावर कम्पनी लिमिटेडको प्रवर्द्धनमा दरौँदी नदीमा ९.८४ मेगावाट क्षमताको जलविद्युत आयोजना निर्माण गर्न लागिएको कम्पनीका अध्यक्ष डा. डम्बरबहादुर नेपालीले जानकारी दिए। आयोजना निर्माण गर्दा कूल लगानीको ७० प्रतिशत ऋणबाट लगानी गर्ने र बाँकी स्वपुँजीअन्तर्गत लगानी रहने उनले बताए।
‘सिमलगैरामा विद्युतगृह रहने गरी दरौँदी नदीमा जलविद्युत आयोजना निर्माण गर्न लागिएको हो,’ उनले भने, ‘दरौँदी नदीमा बाँध बाँधेर कर्मसिं फाँटको रातडाँडामा बाँध रहने गरी आयोजना निर्माण हुनेछ।’
गोरखा–१२, १३ र १४, सहिद लखन गाउँपालिकाका–१, २ र ३ तथा पालुङटार नगरपालिका–३ वडाका गरी आयोजनाले कूल ४ सय ४० रोपनी क्षेत्रफल ओगट्ने छ। प्रारम्भिक वातावरणीय परीक्षण प्रतिवेदनअनुसार आयोजनाले खेतीयोग्य जमिन १ सय २३ रोपनी, २ सय ९२ रोपनी बगर क्षेत्र, ३८ रोपनी स्थायी तथा अस्थायी जमिन र १७ रोपनी सामुदायिक वन क्षेत्रफल ओगट्ने छ।
‘आयोजनाको मुख्य संरचना गोरखा–आँबुखैरेनी सडकखण्डको पहुँच क्षेत्रमा रहनेछ,’ आयोजनाका इन्जिनियर अनिल नेपालले भने, ‘अर्धजलाशययुक्त आयोजनाको जलाधार क्षेत्र पाँच सय ३६.५४ वर्गकिलोमिटर रहने छ।’
कम्पनीले आयोजना निर्माणस्थल र प्रभावित क्षेत्रका बासिन्दाको धारणा बुझेर वातावरणीय प्रभाव मूल्यांकन प्रतिवेदनलाई अन्तिमरूप दिन सार्वजनिक सुनुवाइ कार्यक्रम गरी राय सुझावसमेत संकलन गरिसकेको छ।
स्थानीयवासीले आफूहरूलाई आयोजनामा सहभागी गराउनुपर्ने, जग्गा अधिग्रहण गर्दा उचित मुआब्जा दिनुपर्ने, स्थानीयलाई रोजगारी सुनिश्चित गर्नुपर्ने, डुबान तथा प्रभावित क्षेत्रका बासिन्दालाई आयोजनाको सेयर उपलब्ध गराउनुपर्नेलगायतका माग सार्वजनिक सुनवाइका क्रममा गरेका थिए।
प्रभावित क्षेत्रका बासिन्दाको राय सुझाव थप गरेर अब वातावरणीय प्रभाव मूल्यांक्न प्रतिवदेन स्वीकृतिका लागि वन तथा वातावरण मन्त्रालयमा पेस गरिने र मन्त्रालयबाट स्वीकृति प्रदान भएलगत्तै विद्युत उत्पादन अनुमतिका लागि विद्युत विभागमा निवदेन दिएर तत्काल काम अघि बढाउने कम्पनीका सञ्चालक बलराम केसीले जानकारी दिए।
विभागबाट अनुमति पाएपछि आगामी माघ पहिलो सातादेखि आयोजनाको संरचना निर्माणका काम थाल्ने योजना रहेको कम्पनीले जनाएको छ। आयोजना निर्माण सुरु भएको साढे दुई वर्षभित्रमा विद्युत उत्पादन गर्ने कम्पनीको लक्ष्य छ।
