काठमाडौं। बिजनेस नेपाल म्यानेजमेन्ट प्रालिद्वारा प्रकाशन हुँदै आएको क्यापिटल बिजनेस म्यागजिनका संस्थापक सम्पादक राजेन्द्र पराजुलीको निधन भएको छ।
उनलाई गएराति छातिमा समस्या भएपछि ललितपुरको ग्वार्कोस्थित बिएन्डबी अस्पतालमा भर्ना गरिएको थियो। सघन उपचार कक्षमा उपचाररत पराजुलीलाई बिहान ७ बजे चिकित्सकले मृत घोषणा गरेका थिए ।
२०७५ सालमा क्यापिटल म्यागजिन स्थापनापछि पराजुलीले करिब तीन वर्ष सम्पादकको जिम्मेवारी सम्हालेका थिए।
पत्रकारिता र कथा साहित्य विधामा दशकौंदेखि कलम चलाउँदै आएका पराजुलीले हिमाल खबरपत्रिका, नेपाल समाचारपत्र, नागरिक, अभियान, बाह्रखरीलगायत दर्जन बढी मिडियामा काम गरेका थिए। विभिन्न पुरस्कार तथा सम्मान प्राप्त गरेका पराजुली साझा प्रकाशनको सञ्चालक समिति सदस्य पनि भएका थिए।
पराजुलीको पछिल्लो कथासंग्रह जन्तरमन्तर हालै प्रकाशित भएको थियो। त्यसअघि उनका अघोरी, कोटेश्वरको केटो, शुक्रराज शास्त्रीको चश्मा, अनायिका, सपनामा मार्क्स, जाडोमा भोक, भ्रष्ट संवेदना, विकल्प यात्रालगायत कृति प्रकाशित छन्।
५८ वर्षीय पराजुलीका श्रीमती, एक छोरा र एक छोरी छन्।
-1732541848.jpg)
