काठमाडौं। नेपालका लागि युरोपेली कार ब्रान्ड स्कोडाको आधिकारिक विक्रेता एमएडब्लु एक्सपान्जे प्रालिले नयाँ प्रिमियम सेडान 'स्लाभिया' सार्वजनिक गरेको छ।
नयाँ स्कोडा स्लाभिया दुई ट्रान्समिसन अप्सन र तीन भेरिएन्टमा उपलब्ध हुनेछ। यसको डिफ्रेन्ट डिजाइन र प्रिमियम फिचरले दुई दशकदेखि नेपाललाई विश्वस्तरीय सेडान उपलब्ध गराउँदै आएको स्कोडाको विरासत कायम गर्ने अपेक्षा कम्पनीको छ।
‘स्लाभिया भीडमा आफ्नो फरक छवि बनाउन चाहनेका लागि डिजाइन गरिएको प्रिमियम मिड साइज सेडान हो। स्कोडाको स्लिक डिजाइन रहेको स्लाभियामा आधुनिक र किफायती इन्जिन जडान गरिएको छ। साथै, मजबुत सुरक्षाका लागि परिचित स्कोडाले यसको सुरक्षामा कुनै कम्प्रमाइज गरिएको छैन,’ एमएडब्लु एक्सपान्जेका कार्यकारी निर्देशक रौनक अग्रवालले भने।
नयाँ स्कोडा स्लाभियामा १.० लिटरको थ्रि सिलिन्डर ६ स्पिड म्यानुअल र ६ स्पिड टर्क कन्भर्टर अटोमेटिक टर्बो पेट्रोल इन्जिनले ११५ पिएस पावर र १७८ एनएम टर्क उत्पन्न गर्छ। टिएसआई इन्जिनलाई मितव्ययी मानिन्छ जसले १९.४७ किलोमिटर माइलेज दिन्छ। साथै, यसले १०.७ सेकेन्डमा १ सय किलोमिटर प्रतिघन्टाको गति लिन सक्छ।
स्लाभिया सेग्मेन्टकै सबैभन्दा ठूलो सेडान हो, जसले पाँच वयस्क यात्रीलाई पर्याप्त हेड, सोल्जर र लेगरुम प्रत्याभूत गर्छ। साथै, यसको ग्राउन्ड क्लियरेन्स १७९ एमएम छ जुन सेग्मेन्टमै सबैभन्दा बढी हो।
स्लाभियामा ६ एयरब्याग, इलेक्ट्रिक स्टेबिलिटी कन्ट्रोल, इलेक्ट्रोनिक डिफरेन्सियल सिस्टम, मल्टिकोलिजन ब्रेक, पार्किङ सेन्सर, अटोमेटिक ब्रेक डिस्क क्लिनिङ फङ्सन, रियर भ्यु क्यामेरा, टायर प्रेसर मनिटरिङ, हिल होल्ड कन्ट्रोल, क्रुज कन्ट्रोल, अटोहेडल्याम्प र वाइपरजस्ता सुरक्षाका फिचर पनि उपलब्ध छन्। उत्कृष्ट सुरक्षाका कारण स्लाभियाले ग्लोबल एनसिएपी रेटिङमा फाइभ स्टार हासिल गरेको छ।
ड्यास बोर्डको बीचमा वायरलेस एन्ड्रोइड अटो र एप्पल कार प्लेसहितको १० इन्चको एडभान्स्ड टचस्क्रिन, ८ इन्चको डिजिटल ककपिट, रियर पेसेन्जर डुअल एसी भेन्ट, डुअल युएसबी पोर्ट पनि छ।
यो प्रिमियम सेडान क्रिस्टल ब्लु, क्यान्डी ह्वाइट, ब्रिलियन्ट सिल्भर र कार्बन स्टिललगायत आकर्षक रङमा उपलब्ध छ। कम्पनीले यसको मूल्य ४९ लाख ४० हजारदेखि ७४ लाख ९० हजारसम्म निर्धारण गरेको छ।
