काठमाडौं। आत्महत्या रोकथामका लागि सरकारले सञ्चालन गरेको राष्ट्रिय हेल्पलाइन ११६६ मा अब एनसेलका ग्राहकले निःशुल्क फोन गरेर मनोपरामर्शदातासँग परामर्श लिन सक्ने भएका छन्।
यसका लागि एनसेल आजियाटा लिमिटेड र मानसिक अस्पतालले सहकार्य गरेका हुन्।
हालै विश्व आत्महत्या रोकथाम दिवसका अवसरमा मानसिक अस्पताल लगनखेलमा आयोजित एक कार्यक्रममा एनसेलले यस हेल्पलाइनका लागि सिमसहितको ह्यान्डसेट सोलुसन्स हस्तान्तरण गरेको छ। योसँगै अब यो हटलाइनमा एनसेल नेटवर्कबाट पनि फोन लाग्ने भएको हो।
आत्महत्या रोकथामका लागि राष्ट्रिय हेल्पलाइन ११६६ मा एनसेलबाट पनि सेवाको पहुँच सुनिश्चित भएको अवसरमा एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले भने ‘हामी सबैको जीवनमा स्वस्थ मानसिक स्वास्थ्यले ठूलो भूमिका राख्छ। राष्ट्रिय हेल्पलाइनमा आबद्ध भई यो सेवा अझ प्रभावकारी बनाउन योगदान पुर्याउन सहकार्य गर्न पाएकोमा हामी हर्षित छौं।’
कुनै पनि व्यक्तिमा आत्महत्याको सोच आए, कोही व्यक्तिले त्यस्तो व्यवहार देखाए, आत्महत्याको अवस्थाबाट उनीहरूलाई बचाउने उद्देश्यले सरकारले यो हेल्पलाइन सुरु गरेको हो।
‘आत्महत्याको सोच र अन्य मानसिक स्वास्थ्य समस्याबारे फोन आउने क्रम बढिरहेको हाम्रो तथ्यांकले देखाउँछ। यस्तो अवस्थामा एनसेलको यो सहकार्यले ठूलो महत्व राख्छ र अमूल्य जीवन बचाउन योगदान पुर्याउने छ,’ मानसिक अस्पतालका निर्देशक डा। अनन्तप्रसाद अधिकारीले भने।
जहिले मनमा गाह्रो महशुस हुने, तनाव हुने, आफैंलाई हानि पुर्याउन वा दुःख दिन मन लाग्नेजस्ता लक्षण देखिए तत्काल यस हटलाइनमा फोन गरी तालिम प्राप्त मनोपरामर्शदातासँग परामर्श गरी त्यस्ता सोचबाट बाहिर आउन मद्दत लिन सकिने मानसिक अस्तपालले जनाएको छ।
सरकारले विश्व स्वास्थ्य संगठन र टिपिओ नेपालको सहयोगमा मानसिक अस्पताल लगनखेल पाटनबाट यो सेवा सञ्चालन गर्दै आएको छ।
