चितवन। वर्षातका कारण पुल्चोकबाट गोन्द्राङसम्मको पूर्वपश्चिम राजमार्गअन्तर्गत ६ लेन सडक निर्माणको काम प्रभावित बनेको छ। नारायणगढको मुख्य बजार क्षेत्रमा ‘ग्राभेलिङ’ गर्नुपर्ने बेलामा पानी जमेपछि काम प्रभावित बनेको हो।
डिभिजन सडक कार्यालय भरतपुरका प्रमुख रमेश पौडेलका अनुसार बजार क्षेत्रमा पानीका कारण काम प्रभावित भएको छ। उनले भने, ‘चार–पाँच दिन पानी रोकियो भने काम गर्न सकिन्छ।’ अहिले पानी जमेपछि ग्राभेल बिच्छ्याएर रोलिङ गर्न नमिलेको उनले जानकारी दिए।
यससँगै भरतपुर ओरालोमा खानेपानीको पाइप सार्ने काम भइरहेकाले सडकको काम प्रभावित बनेको छ। तत्कालका लागि काम गर्न बजेट रहेकाले आर्थिक कारण काम नरोकिएको उनले बताए।
यस आर्थिक वर्षका लागि ५ करोड रुपैयाँमात्रै बजेट विनियोजन भएको छ। थप बजेटका लागि सडक विभागमा मौखिक कुरा भइरहेको जनाउँदै उनले कात्तिक महिनामा बजेट माग गरिने बताए।
हालसम्म उक्त सडकखण्डको ७० प्रतिशत काम सम्पन्न भएको छ। विसं २०७७ असोज २६ गते भएको सम्झौताअनुसार ठेकेदार पक्षले विसं २०७९ फागुन १० गते निर्माणको काम गरिसक्नुपर्ने थियो। कोरोना, निर्वाचनलगायत विभिन्न कारणले गर्दा समयमै काम सम्पन्न हुन नसकेपछि समय थप गरिएको छ। नयाँ सम्झौताअनुसार आगामी मङ्सिरको २३ गतेसम्म सडक विस्तार गरिसक्नुपर्ने हुन्छ।
१ अर्ब २३ करोड रुपैयाँको लागतमा पुल्चोक–गोन्द्राङ सडक ६ लेनमा विस्तारको काम भइरहेको हो। सडक निर्माण कम्पनीका प्रमुख सहदेव खड्काले वर्षात र खानेपानीका पाइपका कारण कामलाई तीव्रता दिन नसकिएको बताए। छिट्टै कामलाई तीव्रता दिने उनको भनाइ छ।
कम्पनीसँग आवश्यक उपकरण, जनशक्ति र कच्चा पदार्थ रहेकाले पानी पर्न रोकिएसँगै कामले तीव्रता पाउने उनले बताए। भरतपुर र नारायणगढको मुख्य सहरी क्षेत्र हुँदै जाने सडक निर्माण प्रभावित भएपछि यहाँको व्यवसाय पनि प्रभावित बनेको छ। व्यवसायीहरूले यथाशीघ्र काम अघि बढाउन दबाब दिँदै आएका छन्।
