काठमाडौं। पहिलोपटक एसिया कपमा सहभागिता जनाएको नेपालले भारतलाई जितका लागि २३१ रनको चुनौती दिएको छ।
श्रीलंका पालेकेले अन्तर्राष्ट्रिय क्रिकेट रङ्गशालामा टस हारेर पहिले ब्याटिङको निम्तो पाएको नेपालले ४८.२ ओभरमा सबै विकेट गुमाउँदै २३० रनको योगफल बनायो।
अन्तर्राष्ट्रिय क्रिकेट खेलको २७ वर्षपछि पहिलो पटक भारतसँग खेलेको नेपालले उत्कृष्ट खेल प्रदर्शन गर्यो। नेपालका लागि सुरुआती ब्याट्सम्यान आसिफ शेखले सर्वाधिक ५८ रनको योगदान दिए। उनले ९७ बलमा ८ चौकाको मद्दतमा सर्वाधिक ५८ रनको योगदान दिए। उनी एसिया कपमा तथा भारतविरूद्धको खेलमा अर्धशतक प्रहार गर्ने पहिलो नेपाली खेलाडीसमेत बने।
त्यसैगरी अर्का सुरुआती ब्याट्सम्यान कुशल भुर्तेल ३८ रन बनाएर आउट भए। शार्दुल ठाकुरको बलमा दशौँ ओभरको पाँचौं बलमा आउट हुनुअघि उनले २५ बलमा ३ चौका र २ छक्काको मद्दतमा ३८ रन बनाएका हुन्। उनले आसिफ शेखसँग पहिलो विकेटका लागि ९.५ ओभरमा ६५ रनको साझेदारी गर्दै नेपाललाई राम्रो सुरुआत दिलाएका थिए। भुर्तेल पेभेलियन फर्किएपछि नेपालले लगातार विकेट गुमाउन पुग्यो।
कप्तान रोहित पौडेल भारतका रवीन्द्र जडेजाको बलमा पाँच रनमा आउट भए। कुशल मल्ल चौथो विकेटको रूपमा दुई रनमै आउट भए। भीम सार्की पनि सात रनमा भारतका जडेजाको बलमा १६ ओभरमा बोल्ड हुन पुगे। त्यसैगरी छैटौँ विकेटको रूपमा गुल्सन झा २३ रन बनाउँदै पेभेलियन फर्किए। उनले ३५ बलमा ३ चौकाको मद्दतमा २३ रन बनाएका थिए।
सातौँ विकेटका रूपमा नेपालले दीपेन्द्र सिंह ऐरीलाई गुमायो। उनी खेलको ४१.१ ओभरमा २९ रन जोड्दै आउट भए। उनले २५ बलमा तीन चौकाको मद्दतमा २९ रन बनाएका हुन्। नेपालले आठौँ विकेटको रूपमा सोमपाल कामीलाई गुमायो। सोमपाललाई भारतका मोहम्मद शामीले आउट गराएका हुन्। उनले ५६ बलमा दुई छक्का र एक चौकाको मद्दतमा ४८ रन बनाए।
त्यसैगरी खेलको ४७.४ ओरभमा नवौँ विकेटको रूपमा सन्दीप लामिछाने आउट भए। उनले १७ बल खेल्दै नौ रन बनाए। त्यस्तै ललित राजवंशी शून्य रनमा आउट हुँदा करण केसी दुई रनमा अविजित रहे।
बलिङतर्फ भारतका रवीन्द्र जडेजा र मोहमद सिराजले समान तीन÷तीन विकेट लिए भने मोहम्मद शामी, हार्दिक पाण्डे र शार्दुल ठाकुरले समान एक÷ एक विकेट लिए। यस खेलमा जित हात पार्ने टोलीले सुपर फोरमा स्थान बनाउने छ।
३७.५ ओभर सकिँदा खेल वर्षाका कारण करिब ४५ मिनेट अवरुद्ध भएको थियो। त्यतिबेला नेपालले ६ विकेटको क्षतिमा १७८ रन बनाएको थियो।
-1732541848.jpg)
