मलेखु। धादिङ धुनीबेंसी नगरपालिका–७ मा पर्ने गुर्दुम गाउँमा मध्यबर्खामा पनि खानेपानी समस्या छ। यो गाउँ धुनीबेंसी लेकको नामले पनि परिचित छ। पृथ्वी राजमार्गको नौबिसेबाट करिब तीन घन्टा पैदल यात्रापछि पुगिने गुर्दुम गाउँमा खानेपानीको भने सास्ती हुने गरेको छ।
यहाँ खानेपानी थाप्ने छुट्टै नियम छ। गाउँभरिमा एउटैमात्र धारो छ। बिहान उज्यालो नहुँदै गाउँलेहरु गाग्रो, जर्किन, बोत्तल बोकेर धारोमा पुग्छन्। टाढादेखि आउन ढिला हुनेहरुले अघिल्लो दिन साँझ नै पानी थाप्ने भाँडा लाइनमा राखेर जान्छन्। एक घरले बढीमा चार भाँडामात्र पानी थाप्न पाउने नियम छ। जस्तोसुकै अवस्थामा होस् कसैले पनि पालो उछिन्न नपाइने नियमलाई सबैले पालना गर्नैपर्छ।
स्थानीय शेरबहादुर तामाङले भने, ‘सबैले चार–चार भाँडा थाप्ने नियम छ, पुगेन भने भाँडो त्यहीँ थन्क्याएर भोलिपल्टमात्रै थाप्न पाइन्छ।’ उनका अनुसार यहाँ अहिले पनि खानेपानी पुगेको छैन।
जताततै पानीको छ्यालछ्याल हुनुपर्ने बर्खामा एक भाँडो पानी थाप्नकै लागि आधा रातमै उठेर लाइन बस्न दगुर्नु यहाँका स्थानीयको बाध्यता हो। भौगोलिक हिसाबले संघीय राजधानी काठमाडौंबाट नजिक र नगरपालिकाभित्र पर्ने भए पनि यो गाउँ विकट मानिन्छ। पानी, बत्ती र बाटो यी तिनै पूर्वाधारबाट यहाँका स्थानीय वञ्चित छन्।
शेरबहादुरले भने, ‘मध्यबर्खामा पनि पानी पैँचो मागेर प्यास मेटाउनु हाम्रो बाध्यता हो। पैँचो नपाएका बेला आकाशेपानीले नै प्यास मेटाइरहेका हुन्छौँ।’
गुर्दुम गाउँका ६८ घरधुरीका लागि एउटा मात्रै धारा छ। ‘भएको एउटा धारामा पनि पानी कहिले आउँछ टुङ्गो हुँदैन। धारामै पानी आए पनि धितमर्ने गरी पानी खान पाइदैन,’ उनले भने, ‘खोलाको पानीलाई दुईवटा मेसिनको सहायताले धारामा ल्याइने गरेको छ। बत्तीको पावरले त्यति नधान्ने भएकाले धारामा नियमित पानी आउँदैन।’
मेसिनको सहायताले धारामा ल्याइएको पानी ६ महिना मुस्किलले खान पाइने भन्दै शेरबहादुरले बाँकी ६ महिना खोला धाउनुपर्ने बाध्यता रहेको बताए।
स्थानीय कविता तामाङका अनुुसार पोखरीडाँडामा पानी जम्मा गर्ने एउटा सानो ट्याङ्की छ। ‘गाउँभन्दा धेरै तलबाट मोटर लगाएर तानिएको छ। दैनिक पाँच हजार लिटर पानी ट्याङ्कीमा जम्मा हुन्छ,’ उनले भनिन्, ‘पाँच हजार लिटर पानीले ६८ घरपरिवारले प्यास मेटाइरहेका छन्।’
एक घरले दैनिक अधिकतम चार भाँडो अर्थात् ८० लिटरका दरले पानी भागमा पाउने उनले जानकारी दिइन्।
माइक्रो हाइड्रो पावरको बत्ती प्रयोग गरेर पानी तानिएको भन्दै बिजुलीको क्षमता नभएकाले ठूलो मोटरले पानी तान्न नसकने कविताले बताइन्।
गाउँमा बिजुली बिग्रिएको बेला एक दिन थापेको चार भाँडो पानीले दुई÷तीन दिन धान्नुपर्ने यहाँका स्थानीयको बाध्यता छ। ‘त्यो पनि हावाहुरी चलेका बेला बिजुली बिग्रियो भने आकाशे पानी थापेर खानु सबैको बाध्यता हो,’ उनले दुःख सुनाइन्।
गाउँको धारोमा पानी भाग नपुगेको दिन आवतजावत पाँचदेखि ६ घन्टा लगाएर पानी बोक्नुपर्ने बाध्यता रहेको कविताले बताइन्। ‘खोलामा पानी लिन जान सबैभन्दा नजिक घर हुने पनि अप्ठ्यारो बाटो दुई घन्टा ओरालो झर्नुपर्छ,’ उनले भनिन्, ‘पाखुरे, काउलेखोला, फुर्लुङडाँडाबाट झर्नेलाई त तीन घन्टा नै लाग्छ।’
पानीको दुःखले भोक, निन्द्रा केही नलाग्ने स्थानीय मैना तामाङको भनाइ थियो। खानेपानी कसरी जुटाउने, वस्तुभाउलाई कहाँबाट ल्याउने भन्ने चिन्तामा यहाँका स्थानीयको दिन बित्ने गरेको उनले बताइन्। खाना पकाउन आकाशे पानीको प्रयोग गर्ने गरिएको बताउँदै उनले खोलामा बाढी आएका बेला आकाशेपानी नै खाने गरेको बताइन्। ‘लुगा धुन, नुहाउन खोलामा नै जान्छन्,’ मैनाले भनिन्, ‘पानीको जोहो गर्दैमा एक बिहान सकिन्छ, काम गर्न पनि भ्याउँदैन।’
घरको काम, खेतबारी, बालबच्चा हेरचाह, मेलापात गुर्दुमवासीको दैनिकी हो। सरकारले सहरबजारमा खानेपानी पुर्याउन करोडौंको लागतमा आयोजना सञ्चालन गरे पनि गुर्दुमवासीलाई खानेपानीको सधैँ कष्ट छ। ‘हिउँमा त खोलाको दूषित पानी खानुपर्ने बाध्यता छ,’ मैनाले भनिन्, ‘गाउँमा खानेपानीको आयोजना सञ्चालन नहुँदा दशकौँदेखि स्थानीयले खोलाको पानीले प्यास मेटाउँदै आएका छन्।’
‘एक घर एक धारा’ तीनै तहका सरकारको नीति तथा कार्यक्रम भए पनि कार्यान्वयन नहुँदा उपभोक्ता वर्षौंदेखि खानेपानीको सास्ती व्यहोर्न बाध्य छन्। गत आर्थिक वर्षमा दुईवटा ट्यांकी निर्माण गरी पानी ल्याउने योजना बनाइए पनि मुहानबाट ट्याङ्कीसम्म पानी पुर्याउन नसकिएको स्थानीय बताउँछन्।
यस्तो छ योजना
‘फियान नेपाल’ नामक गैरसरकारी संस्थाको सहयोगमा बजेट माग्दै स्थानीय नगरपालिका गएपछि आर्थिक वर्ष २०७८÷७९ मा खानेपानीका लागि ४० लाख रुपैयाँ बजेट विनियोजन भएको थियो। उक्त रकममा दुईवटा ट्याङ्की निर्माण गरिएको छ। एउटा गाउँको सिरानमा र अर्को गाउँको बीच भागमा छ।
आर्थिक वर्ष २०८०/८१ मा ६१ लाख रुपैयाँमा पलभिस कन्ट्रक्सनले दुई योजना निर्माणको जिम्मा पाएको थियो। गाउँको सिरानसम्म एउटै लिफ्टिङबाट सम्भव नभएपछि प्राविधिक सल्लाहअनुसार दुईवटा लिफ्टिङ गरेर पानी तान्ने योजना बनेको ठेकेदार कम्पनीका प्रमुख सुनिल शर्माले जानकारी दिए। उनका अनुसार पहिलो लिफ्टमा बीचको ट्याङ्कीमा जम्मा गर्ने दोस्रो लिफ्टमा बीचको ट्याङ्कीबाट सिरानको ट्याङ्कीमा हालेर गाउँमा वितरण गर्ने योजना छ।
यसै वर्ष खोलाको पानी ५० हजार लिटर सङ्कलन गरी ट्याङ्कीमार्फत गाउँसम्म पुर्याउने उद्देश्यले काम थालिएको प्रमुख शर्माले बताए। असारमै काम सक्नुपर्ने भए पनि वर्षामा भौगोलिक विकटता, निर्माण सामग्रीको अभावलगायत कारणले काम रोकिएको उनको भनाइ थियो। पानी तान्ने पाइप गाउँसम्म पुर्याइएको भन्दै उनले अब छिट्टै पुनः काम थाल्ने तयारी भइरहेको जानकारी दिए।
-1732541848.jpg)
